Jyr dúldúli Jambyldyń tereń mazmundy rýhanı murasyn zertteý men zerdeleýdi arqaý etken dóńgelek ústel basynda tarıhshylar aqyn murasyn halqymyzdyń rýhanı ıgiligine aınaldyrý baǵytyndaǵy tujyrymdaryn ortaǵa salyp, rýhanııat álemindegi, sonymen birge óskeleń urpaq tárbıesindegi máni men mańyzy turǵysyndaǵy ǵylymı negizdi oılaryn ortaǵa saldy.
Zamana únin aqyn janymen jyrlaǵan Jambyl murasynan sýyryp salmalyǵy, kesteli sózdiń sheberi, ushqyr oıly, tapqyr sheshendigi aıqyn kórinedi. Aqynnyń jaýhar jyrlarynyń otandyq ǵylym úshin aýqymy keń. Jambyl shyǵarmashylyǵy Qazaqstan tarıhshylaryn tarıhı obektıvti shyndyqtan aýytqymaı zertteýge úıretedi. Jambyl jyraýlardyń baıtaq epıkalyq dástúrin, qazaq sóz ónerindegi ǵajaıyp ımprovızasııalyq úrdisti bútindeı jańa arnaǵa buryp, oǵan jańa mazmun darytýy kúdik týdyrmaıdy. Jambyl – izgilik jolyndaǵy azatshyl azamatty násiline, ultyna bólmegen shyn mánindegi jasampaz aqyn. Jambyl jyrlary teńiz túbinde shashylyp jatqan marjan sekildi. Jambyl – jyrdyń tolassyz bulaǵy, óshpes ónegesi, tozbaıtyn asyly. Halyqtyq jyrdyń negizinde nemese jyraýlar poezııasynyń úlgisinde búgingi men ótkendi sabaqtastyra jyrlaıtyn aqyndar sol kezeńde joqtyń qasy bolatyn. Jambyl sol úrdisti qalyptastyra bildi. Ol jasampaz urpaqpen syrlasyndaı, qımasyndaı máńgi birge jasaı beredi.
Osy mazmunda jalǵasyn tapqan dóńgelek ústel barysynda Qazaqstannyń tarıh ǵylymynda Jambyl Jabaevtyń rýhanı murasyn paıdalanýdyń jáne damytýdyń jańa joldary qarastyryldy. Jambyldyń rýhanı murasynyń Qazaqstan tarıhyna yqpalyn saraptaı kele respýblıkalyq onlaın dóńgelek ústelge qatysýshylar aqynnyń rýhanı murasynyń tarıhı qarlaryn zerteýge arnalǵan granttyq qarjylandyrý jobalaryn daıyndaý jáne usynýǵa baılanysty jáne de dáýir tarıhyna qatysty pikirlerin, kózqarastaryn, ıdeıalaryn saraptaýǵa arnalǵan keshendi zertteýler júrgizýdi, Jambyl esimi jańashyldyqtyń úrdisinde kósh bastaıtyn, shyǵarmashylyǵy áli de zertteýdi qajet etetin birden-bir tulǵa bolǵandyqtan ǵylymı-zertteý ınstıtýttary, ýnıversıtetter birlesip, aqynnyń ómiri men qyzmetine arnalǵan jınaqty jaryqqa shyǵarýdy usyndy. Sondaı-aq, tarıhshy ǵalymdar Jambyldyń ómiri men qyzmetine, shyǵarmashylyǵyna arnalǵan maqalalardy tarıhı ensıklopedııalarǵa, oqýlyqtarǵa, kóptomdyq Qazaqstan tarıhyna engizý, aqynnyń rýhanı murasy negizinde qazaqstandyq otanshyldyqty, eńbeksúıgishtikti, gýmanızmdi, shynshyldyqty tárbıeleý, tarıhı sanany qalyptastyrý tujyrymdamasyn jasaýmen qatar ulttyq qundylyqtarǵa, onyń aqtańdaq betterine qatysty oı-pikirlerin, ıdeıalaryn júıeleý arqyly olardy halyqtyń rýhanı ıgiligine aınaldyrý joldaryn kórsetýge baılanysty máselelerdi ortaǵa saldy.
