«Áleýmettik medısınalyq saqtandyrý qory» KEAQ BQO boıynsha fılıalynyń dırektory Nurjamal Jumaǵulovanyń óńirlik kommýnıkasııalar qyzmeti alańynda ótken brıfıngide málim etkenindeı, kovıdten emdeý úshin ambýlatorııalyq-dárilik qamtamasyz etýge 5 preparat engizildi.
Atalǵan dári-dármekpen ótken jyly 47,7 mln teńgege 19768 pasıent qamtyldy.
Nurjamal Shamǵonqyzynyń sózine qaraǵanda, koronavırýsqa shaldyqqan 17328 naýqas 2,1 mlrd teńgege em aldy.
Barlyǵy 50087 PTR-dıagnostıkaǵa 489 mln teńge tólendi. 19054 mobıldi brıgadanyń shyqqany úshin 116 mln teńge jumsaldy.
Barlyq qarjy negizinen indetpen kúreske baǵyttalǵanymen, medısınalyq qyzmet kórsetý, ońaltý jumystary da jalǵasyn tapty.
Mysaly, 2965 emdelýshi mindetti áleýmettik medısınalyq saqtandyrý aıasynda táýlik boıy stasıonarlarda 608,9 mln teńgeniń medısınalyq ońaltý qyzmetin aldy.
Josparly túrde stasıonarlarda 70631 pasıent 7,49 mlrd teńgege emdeldi, 11,8 myń adam bosansa (1,22 mlrd teńge), 3,4 mlrd teńgege 15,4 myń ota jasaldy.
«Mindetti áleýmettik medısınalyq saqtandyrý júıesin iske qosýdaǵy ózekti máseleniń biri – azamattardy saqtandyrý. «Saqtandyrý» bazasynyń derekteri boıynsha bıylǵy 1 naýryzda oblysta saqtandyrylǵan halyqtyń sany 84,2 paıyz bolsa, saqtandyrylmaǵandardyń úles sany 15,8 paıyz nemese 108491 adamdy qurap otyr. О́tken jyldyń shilde aıynda saqtandyrylmaǵandardyń úles sany 22,4 paıyz bolǵan edi. Bul jergilikti atqarýshy organdarmen birlese júrgizilip jatqan jumystardyń oń nátıje berip otyrǵanyn kórsetedi», dedi N.Jumaǵulova.
