Sodan beri jyldar ótti tizbektelip. Elbasyna arqa súıep úırengen halyq kóńili alańsyz, jaıbaraqat kún keshti. Biraq táýelsizdikke qol jetkizgen eldiń táýelsizdiginen aıyrylyp qalmaıtyn qazyǵyn berik ornatý tek Elbasynyń jaýapkershiliginde bolǵany ras. Eńsesin tiktegen eldiń budan bylaı ózgeniń baýyrynan jylý izdep jáýteńdemeıtin, jalpaqtamaıtyn bilimdi, isker urpaǵyn qalyptastyrdy. Jańa memleket, jańa basqarý júıesi, jańa saıası kózqaras, jańa býyn qalyptasa bastady.
Elbasy únemi «Men bitirdim degenshe, el bitirdi deseıshi» degen danalyqty ustandy. Halqynyń danalyǵyna arqa súıedi. Ýyǵyn ózi qadaǵan, arman men maqsatyna qol jetkizgen bul eldiń taǵdyry talaı baz keshken uıqysyz kúnderiniń kýási bolar. Súrinip baryp túzelgen, úzilip baryp jalǵasqan kóshtiń jolyn qyrandaı qadaǵalap, eliniń beıbit kúnin kúzetti. Memlekettiń taǵdyry da adam taǵdyryna uqsas, ony soǵys apattarynan, tamyryna túsetin jegiqurttan, saıası oıyndardyń lańynan saqtap qalý úshin kúres júrip jatty. Osy jolda ózimen birge qazaqtyń tańdaýly, kúresker, Otany úshin otqa túsetin, óz taǵdyryn el taǵdyryna arnaǵan azamattarǵa senim artty. «Atalydan bı qoısań – adaspas jol men joradan, atasyzdan bı qoısań – bosamas aýzy paradan» – Elbasynyń osy izgi senimi memleketti ózimen birge qalyptastyrǵan tulǵalardy anyqtady. Olar da halqynyń súıispenshiligine bólendi. Halqy qaýipsiz, soǵyssyz beıbit kún keshti.
2019 jyldyń 19 naýryzy kúni Elbasy Nursultan Ábishuly Nazarbaev Qazaqstan halqyna málimdeme jasady. Prezıdenttik ókilettigin toqtatý jónindegi sheshimin jarııa etti. Konstıtýsııalyq turǵyda rettelgen bılik sabaqtastyǵyna toqtaldy. Endi memleket basyna jańa býynnyń kelýin qamtamasyz etetinin, al ózi qashanda halqymen birge bolatyndyǵyn aıtty.
Árıne, bul – álem elderinde qalyptasqan úrdis, biraq táýelsizdikke qoly endi jetken, tarıhtyń tar kezeńin bastan ótkizgen bizdiń halyqtyń alań kóńil bolatyn jóni de bar edi.
Elbasy bilimi men parasatyna arqa súıegen, ózimen birge memleketti qurýda úzeńgiles bolǵan, syrtqy eldiń dıplomatııalyq bilimin boıyna ábden sińirgen, Syrtqy ister mınıstri, Premer-Mınıstr, Senat Tóraǵasy, Birikken Ulttar Uıymynyń negizgi bólimin basqarǵan álemdik deńgeıdegi iri saıasatker Qasym-Jomart Kemeluly Toqaevty tańdady. Elbasy bir adamnyń boıyndaǵy osynsha bilim-parasatty aıqyndap aıta kelip: «Ol – ADAL!!!» dedi.
Qobaljyǵan el kóńiliniń sabyrǵa kelgenin kórdi, sheshiminiń qoldaý tabaryna sendi. El taǵdyryn, ózi qurǵan memlekettiń taǵdyryn, ult taǵdyryn Adaldyqqa tapsyrdy.
Roza MUQANOVA,
Abaı atyndaǵy Memlekettik syılyqtyń laýreaty
