– 2019 jylǵy qarashada Pavlodar oblysynyń polısııa departamenti arnaıy jedel-izdestirý is-sharalaryn júrgizý barysynda Pavlodar qalasynyń aýmaǵynda esirtki quraldaryn zańsyz ótkizýmen uzaq ýaqyt boıy aınalysqan oblys ortalyǵynyń turǵyny bastaǵan uıymdasqan toptyń qylmystyq áreketiniń jolyn kesti, – dedi Pavlodar oblysy polısııa departamenti bastyǵynyń orynbasary Rashad О́teýov.
Qylmystyq toptyń quramyna onyń eki uly, birge turatyn áıeli, uldarynyń biriniń áıeli, sondaı-aq Pavlodar qalasynyń esirtkige táýeldi adamdary tartyldy.
Qylmystyq top basshysy men onyń uldarynyń turǵylyqty jeri boıynsha aýqymdy tergeý jáne jedel izdestirý is-sharalaryn júrgizý barysynda asa iri mólsherde «gashısh», «geroın», sondaı-aq 200 keliden astam «marıhýana» esirtki, sondaı-aq atys qarýy tárkilendi.
Mamandandyrylǵan tergeý sotynyń sanksııasymen qylmystyq toptyń qatysýshylaryna qatysty kúzetpen ustaý túrindegi bultartpaý sharasy qoldanyldy.
– 2020 jyldyń 30 jeltoqsanynda Pavlodar oblysynyń qylmystyq ister jónindegi mamandandyrylǵan aýdanaralyq sotynyń úkimimen uıymdasqan qylmystyq toptyń jetekshisi 18 jylǵa bas bostandyǵynan aıyryldy, qalǵan 7 qatysýshy, onyń ishinde asyraýynda 3 kámeletke tolmaǵan balasy bar áıel 16 jylǵa bas bostandyǵynan aıyryldy, – dep atap ótti Rashad О́teýov.
2021 jylǵy 12 naýryzda Pavlodar oblystyq sotynyń qylmystyq ister jónindegi apellıasııalyq sot alqasynyń qaýlysymen birinshi satydaǵy úkim ózgerissiz qaldy.
