QR Ekologııa, geologııa jáne tabıǵı resýrstar mınıstrligi, «QazMunaıGaz Ulttyq kompanııasy» AQ jáne «Qazgeologııa» Ulttyq geologııalyq barlaý kompanııasy» AQ el aýmaǵynyń geologııalyq zerttelýin arttyrý salasyndaǵy yntymaqtastyq týraly kelisimge qol qoıdy.
Osylaısha, taraptar Qazaqstannyń az zerttelgen shógindi basseınderindegi kómirsýtek qorlaryn baǵalaý maqsatynda geologııalyq barlaý jumystaryn júrgizý úshin ınvestorlar tartý boıynsha kúsh-jigerdi shoǵyrlandyrýdy josparlap otyr. Sharalardyń ózektiligi Qazaqstannyń jer qoınaýy búgingi kúni tolyq zerttelmegendigimen jáne jańa ashylýlar úshin eleýli perspektıvalardyń bolýymen baılanysty.
Mysaly, kómirsýtekter boıynsha geologtar boljamdy balamaly otyn qory shamamen 76 mlrd.tonnany quraıtyn 15 shógindi basseındi anyqtady, onyń ishinde aldyn ala baǵalaý boıynsha shamamen 4,5 mlrd. tonnasy az zerttelgen shógindi basseınderde.
Maǵzum Myrzaǵalıevtiń aıtýynsha, Kelisimge qol qoıý salanyń odan ári damýyna yqpal etedi.
«Mınıstrlik Prezıdent pen Úkimettiń eldiń geologııalyq zerttelýin arttyrý jáne sheteldik ınvestısııalardy tartý arqyly mıneraldyq-shıkizat bazasyn tolyqtyrý jónindegi tapsyrmalaryn oryndaý sheńberinde jumysty belsendi júrgizýdi jalǵastyrýda. Kelisim bul jumysqa jańa serpin beredi», dep atap ótti mınıstr.
Sátti nátıjege qol jetkizý úshin Kelisim sheńberinde geologııalyq zertteý jáne barlaý úshin aýmaqtar aıqyndalady, «Roýd-shoý» jáne «Data-rým» - ge qoljetimdilik uıymdastyrylady, sondaı-aq jer qoınaýyn paıdalaný quqyǵyn odan ári alý úshin tıisti qujattar qabyldanady.
Aıta keteıik, bul sharalar Memleket basshysynyń sheteldik ınvestorlar keńesine múshe munaı-gaz kompanııalarynyń basshylarymen jumys kezdesýiniń qorytyndysy boıynsha bergen tapsyrmalaryn iske asyrý bolyp tabylady. Sol kezde mınıstrlik ınvestısııalyq tartymdylyqty jaqsartý jáne geologııalyq barlaý salasyn damytý boıynsha birqatar mańyzdy bastamalardy usynǵan edi.
Jumys kezdesýi qorytyndysy boıynsha sheteldik ınvestorlar keńesiniń múshelerimen birlesip, jer qoınaýyn geologııalyq zertteýden ulttyq kompanııalardyń úlestik qatysýymen barlaýǵa/óndirýge kepildi kóshý úshin tikeleı kelissózder júrgizý quraly retinde qoldanylatyn jer qoınaýyn geologııalyq zertteýge arnalǵan kelisimdi ázirleýge jáne qoldanýǵa negizdelgen tujyrymdamalyq tásil qalyptastyryldy.
Bul tásil ınvestorlarǵa ınvestısııalardyń neǵurlym joǵary quqyqtyq qorǵalýyn jáne turaqtylyǵyn qamtamasyz etedi, sondaı-aq keıinnen jaqsartylǵan modeldik kelisimshartta kórinis tabatyn belgili bir salyqtyq jáne basqa da preferensııalardy alýǵa múmkindik beredi.
