Oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, 200 oryndyq modýldik tıptegi aýrýhana tórt blokqa bólingen. Munda 180 tósek-oryn stasıonarlyq emdeýge, al 20 tósek reanımasııa men qarqyndy terapııaǵa arnalǵan.
– Modýldik aýrýhananyń qurylysy ınfeksııalyq baqylaýdyń barlyq talabyna saı boı kóterdi. Munda dıagnostıka men emdeý úshin zamanaýı medısınalyq jabdyqtardyń bári bar. Atap aıtqanda, kompıýterlik tomografııa, sandyq rentgen, medısınalyq gaz júıesimen, ÝDZ, EKG, ókpeni jasandy jeldetý sekildi eń qajetti apparattarmen qamtyldy. Sondaı-aq qaýipsizdik deńgeıi joǵary «aqyldy» jeldetý júıesi ornatyldy. Ár palatadaǵy naýqastar tósek-orynnyń janyndaǵy arnaıy túıme arqyly medısına qyzmetkerin jedel shaqyra alady. Al oqshaýlanǵan bokstarǵa arnaıy chıppen kirýge bolady. Búırek jetkiliksizdigimen aýyratyn pasıentter úshin gemodıalız jasaý qyzmeti qolǵa alyndy, – deıdi A.Baıdýálıev.
Qazir modýldik ınfeksııalyq aýrýhanada koronavırýs ınfeksııasyn juqtyrǵan 20 naýqas em qabyldaýda. Al oblystyq №2 ınfeksııalyq aýrýhanada qaýipti vırýsqa shaldyqqan 84 naýqas emdelýde. Onyń ishinde 8 pasıent jansaqtaý bóliminde jatyr.
– Naýqastardyń eń úlkeni – 92 jasta, al eń kishisi – 30 jasta. Aýrýhanaǵa úsh júkti áıel túsken edi. Qazir onyń ekeýi bosanyp, qajetti emin alýdy jalǵastyrýda. Buǵan deıin eki bala aýyryp, emdelip shyqty. Jaqynda 20 pasıent modýldik tıptegi jańa aýrýhanaǵa aýystyryldy. Olar qalǵan emin sol medısınalyq nysanda jalǵastyrady, – deıdi №2 oblystyq ınfeksııalyq aýrýhana dırektorynyń orynbasary Nadıa Erǵalıeva.
Onyń aıtýynsha, aýrýhanada polımerazalyq tizbekti reaksııaǵa (PTR) taldaý jasaıtyn ortalyqtandyrylǵan vırýsologııalyq zerthana jumys isteı bastady. Munda táýligine 3 myń naýqastyń analızin tekserýge múmkindik bar. Jańa aýrýhanada naýqastarǵa 15 dáriger-ınfeksıonıst, reanımatolog qyzmet kórsetedi. Olar – ınfeksııalyq aýrýlardy emdeý úshin aldyn ala tolyq daıyndyq kýrstarynan ótken bilikti dárigerler.
Atyraý oblysy
