Elordanyń alǵashqy qadasy qaǵylyp, ákimshilik nysandar boı kótere bastaǵan kezde bas qalada jappaı turǵyn úıler de salyna bastady. Alǵashynda qurylys jumystary qyzý júrdi. Turǵyn úıler salý toqtaǵan joq. Biraq keıin daǵdarysty jaǵdaılarǵa baılanysty sala baıaýlaı bastady. Aqshaǵa qunyǵyp, azamattardyń tirnektep jınaǵan aqshasyn aldyn ala alyp alǵan kompanııalar tyǵyryqqa tireldi. Eki ortada el azamattary úısiz qaldy. Sońynda memlekettiń kómegimen biraz qurylys aıaqtaldy. Biraq bul jaǵdaı da jurtshylyqqa sabaq bola qoıǵan joq. Kúrmeýli qurylysqa aqsha salmańdar degenge qulaq aspaǵandar taǵy da osy qıyndyqqa tap boldy. Keıin qurylysy aıaqtalmaı, uzaqqa sozylǵan keshenderdi qalalyq ákimdik qolyna aldy. Búginde elordada on jyldan beri qurylysy bitpeı jatqan turǵyn úıler bar.
Aıtalyq, «Jeti jol» turǵyn úı kesheniniń salynyp bolmaı jatqanyna on jyl toldy. Mundaǵy úlesker sany – 600-ge jýyq. Qala ákimdiginiń resmı saıtyndaǵy málimetke súıensek, bul úıdiń ınjenerlik jelilerine jobalaý-smetalyq qujattamany túzetý boıynsha jumystar júrgizilgen. Terezelerdi ornatý, ınjenerlik jelilerge qosý syndy jumystar jalǵasyp jatyr.
«Saqaldy qurylysqa» aınalǵan taǵy bir keshender − «Zere-1» jáne «Aqerke-2». Alǵashqysynda 200-ge jýyq úlesker bar. Birinshi kezekte úıge de, ınjenerlik jelilerge de barlyq jobalaý-smetalyq qujattama daıyndalǵan. Alǵashynda munda úıdiń qańqasy ǵana bolǵan. Endi turǵyn úı kesheniniń qasbeti jóndelgen, terezeleri, esikteri, lıftisi ornatylǵan. Sonymen qatar ishki jáne syrtqy árleý jumystary júrgizilip, sýǵa, elektr energııasyna, jylýǵa jáne kárizge qosylǵan eken.
«Aqerke-2» turǵyn úı kesheniniń turǵyndary da jeti jyldan beri úıin kútip júr. Keshenniń qańqasy aıaqtalyp, terezeleri men esikteri salynypty.
Nur-Sultan qalasynyń ákimi Altaı Kólginov Instagram paraqshasynda qurylysy uzaqqa sozylǵan turǵyn úı keshenderinde júrip jatqan jumys jóninde aıta kelip, «Jeti jol», «Zere-1», «Aqerke-2» turǵyn úı keshenderine barǵanyn, pandemııaǵa qaramastan, qurylysty toqtatpas úshin qoldan kelgen múmkindikter jasalǵanyn jetkizdi. Joǵaryda atalǵan úıler osy jyly paıdalanýǵa berilmek.
Jaqynda qala ákimdigi qurylysy kópke sozylǵan, talaı adam úzdigip kútip júrgen «Shyǵys» turǵyn úı kesheninde de úlken seń qozǵalǵanyn aıtyp, turǵyndardy qýantyp qoıdy. Bul kóp qabatty turǵyn úı kesheni birneshe bloktan turady. Úleskerlerdiń jalpy sany 2 myńnan asady. Ákimniń aıtýynsha, barlyq blokqa qarjy bólingen tehnıkalyq aýdıt júrgizilgen, merdigerleri de anyqtalǵan.
Jalpy sońǵy 1,5 jyldyń ishinde elordada qurylysy uzaqqa sozylǵan nysandardyń sany eki ese qysqarypty. Uzaqqa sozylǵan árbir qurylystyń turǵyndary búginde úıin saryla kútip júr. Kóbi qazir júreksinip qalǵan. «Bir kúni qurylys jumysy toqtap qalama dep qorqamyz» deıdi. О́ıtkeni salynyp jatqan ár úıdiń artynda bir otbasynyń taǵdyry tur. Qurylysy uzaqqa sozylǵan úılerdiń turǵyndary sol kezdegi sábıimiz búginde úlken azamat boldy, tipti nemere súıdik dep otyr. Tipti kópten kútken úıin kóre almaı, ómirden ozǵandar da bar...
Nur-Sultan
