Ádette Sýes kanalynan kúnine kem degende 50 keme emin-erkin ótedi. Dúnıe júzinde teńiz saýdasynyń 12 paıyzy osy kanalǵa tirelip otyr. Búgingi kúni úsh táýlikten beri Ever Given kemesi barlyq joldy bógep, kúnine 9,5 mıllıard dollar shyǵyn keltirip otyr.
Aıta keteıik, taıvandyq Evergreen Marin tasymaldaý kompanııasy shyǵarǵan kemeniń uzyndyǵy - 400 metr. Dúnıe júzindegi taýar tasymaldaıtyn eń úlken kemelerdiń biri bolyp esepteledi.
Euronews málimetinshe 24 naýryzǵa qaraǵan túni ol Qytaıdan Rotterdamǵa zat tasyp bara jatqan. Biraq basqa baǵytqa túsip ketken. Mamandardyń aıtýynsha, oǵan aýa raıy nemese elektr qurylǵysyndaǵy aqaý sebep bolǵan. Saldarynan keme Sýes kanalynda tirelip qalyp, basqa kemelerdiń jolyn jaýyp tastaǵan.
«Konteıner tasıtyn kemeler, tankerler Eýropaǵa azyq-túlik, janarmaı, ónerkásip taýarlaryn jetkize almaı jatyr. Eýropadan shyǵys aımaqtarǵa ónimder eksporty toqtatyldy. Munyń óndiriske, Eýropa men Azııadaǵy taýarlar qoljetimdiligine saldary zor», deıdi Kempbell ýnıversıtetiniń tarıh professory Salvatore Merkolıano.
