«Petropavl qalasynda turmystyq gazdyń jarylýy, sondaı-aq Jambyl oblysynyń Jańatas qalasynda jáne Qyzylorda qalasynda órt shyǵý faktileri boıynsha Ishki ister mınıstrligi qylmystyq is qozǵady, tıisti saraptamalar (órttehnıkalyq, sot-medısınalyq jáne jarylys-tehnıkalyq saraptamalar) taǵaıyndaldy», delingen Úkimet basshysynyń depýtattyq saýalǵa bergen jaýabynda.
Onyń aıtýynsha, Jambyl oblysy Jańatas qalasyndaǵy órt boıynsha Jambyl oblysy tótenshe jaǵdaılar departamentiniń órtterdi zertteý jónindegi mamanynyń aldyn ala qorytyndysyna sáıkes, órttiń tehnıkalyq sebebi ashyq ottyń janǵysh materıaldarǵa (aǵash, qaǵaz, materııa, plastık jáne t.b.) taralýynan bolǵan. О́rt páterdegi balalar bólmesinen shyqqan, bul balalardyń otpen oınaýynyń saldary (sirińke, ottyq jáne t.b.) bolýy múmkin.
«Tergeý is-qımyldary aıaqtalǵannan keıin (órttiń sebepterin anyqtaý) tıisti laýazymdy adamdardyń is-áreketterine baǵa beriledi jáne olardyń jaýapkershiligi anyqtalady. О́rtter boıynsha qylmystyq isterdi tergeý barysy Ishki ister mınıstrliginiń erekshe baqylaýyna tur», dedi A. Mamın.
Eske sala keteıik, Májilistiń jalpy otyrysynda depýtattar adam ólimine ákep soqqan Jambyl, Qyzylorda oblystarynda jáne Petropavl qalasynda bolǵan qaıǵyly oqıǵalarǵa baılanysty Úkimet basshysynyń atyna depýtattyq saýal joldaǵan bolatyn.
Osy oraıda depýtattar Premer-Mınıstr Asqar Mamınnen Tótenshe jaǵdaılar mınıstrligi óńirlerdiń ákimdikterimen birlesip, kópqabatty úılerge, ásirese ýaqytsha baspana men saıajaılarǵa, basqa da jaıly emes turǵyn úılerge árbir naqty jaǵdaıda kómek kórsetý turǵysynan tolyq jumystardy júrgizýdi surady.
