Úkimet basshysy Qordyń burynǵy basqarma tóraǵasy Ahmetjan Esimovke Qazaqstan Respýblıkasynyń áleýmettik-ekonomıkalyq damýyna qosqan eleýli úlesi jáne Táýelsizdik jyldary túrli memlekettik laýazymdardaǵy tıimdi jumysy úshin alǵys aıtty. Premer-Mınıstr A. Esimovtiń «Samuryq-Qazyna» UÁQ» AQ transformasııasyn júrgizý jáne jańǵyrtý, Qazaqstan ekonomıkasyn ártaraptandyrý men damytýdy arttyrý jónindegi mindetterdi tabysty sheshkenin atap ótti. Asqar Mamın Qordyń jańa basshysy Almasadam Sátqalıevti tanystyra otyryp, onyń energetıka salasyndaǵy jáne «Samuryq-Qazyna» UÁQ» AQ júıesindegi úlken jumys tájirıbesin atap aıtty.
«QR Tuńǵysh Prezıdenti – Elbasy Nursultan Ábishuly Nazarbaev pen Memleket basshysy Qasym-Jomart Kemeluly Toqaev «Samuryq-Qazyna» qorynyń aldynda mańyzy úlken mindetter qoıyp otyr. Bul elimizdiń ınfraqurylymdyq, kólik-logıstıkalyq jáne ındýstrıaldyq damýyn qamtamasyz etý arqyly, sonymen qatar, otyn-energetıka keshenin damytý, ınvestısııalardy tartý jáne otandyq taýar óndirýshilerge qoldaý kórsetý arqyly ulttyq ekonomıkanyń odan ári turaqty damýyna jaǵdaı jasaý», dedi A. Mamın.
Almasadam Maıdanuly Sátqalıev 1970 jyly 31 qazanda Almaty qalasynda týǵan. Ál-Farabı atyndaǵy Qazaq ulttyq ýnıversıtetin «mehanık, qoldanbaly matematık» mamandyǵy boıynsha, Nazarbaev Ýnıversıtetiniń Joǵary bıznes mektebin, Stenford ýnıversıtetiniń Joǵary bıznes mektebin bitirgen. Ekonomıka ǵylymdarynyń doktory, Qazaqstan Ulttyq jaratylystaný ǵylymdary akademııasynyń akademıgi, Reseı jaratylystaný ǵylymdary akademııasynyń sheteldik múshesi.
1997-2001 jyldary «QazTransOıl» ulttyq munaı tasymaldaý kompanııasy» AQ-da menedjer, klırıng departamentiniń bastyǵy, jobalardy basqarý departamentiniń bastyǵy, basqarýshy dırektor, ekonomıka jónindegi vıse-prezıdenti bolyp jumys istedi. 2001-2006 jyldary «KEGOC» elektr jelilerin basqarý jónindegi qazaqstandyq kompanııa» AQ qarjy dırektory, ekonomıka jónindegi vıse-prezıdenti jáne birinshi vıse-prezıdenti laýazymdaryn atqardy.
2006-2007 jyldary «Samuryq» memlekettik aktıvterdi basqarý jónindegi qazaqstandyq holdıngi» AQ-nyń elektr energetıka aktıvterin basqarý jónindegi dırektory boldy. 2007 jylǵy qańtarda Qazaqstan Respýblıkasynyń energetıka jáne mıneraldyq resýrstar vıse-mınıstri, «Samuryq» memlekettik aktıvterdi basqarý jónindegi qazaqstandyq holdıngi» AQ dırektorlar keńesiniń múshesi bolyp taǵaıyndaldy.
2008-2009 jyldary – «KEGOC» elektr jelilerin basqarý jónindegi qazaqstandyq kompanııa» AQ birinshi vıse-prezıdenti, 2009-2011 jyldary – «Elektr jelilerin basqarý jónindegi qazaqstandyq kompanııa» AQ prezıdenti. 2011 jyly «Samuryq-Qazyna» UÁQ» AQ basqarýshy dırektory bolyp taǵaıyndaldy, 2011-2018 jyldary – «Samuryq-Energo» AQ dırektorlar keńesiniń tóraǵasy, basqarma tóraǵasy. 2018 jyldan bastap qazirgi ýaqytqa deıin – «Samuryq-Qazyna» UÁQ» AQ aktıvterdi basqarý jónindegi basqarýshy dırektory.
