Prezıdentke Básekelestikti damytý jónindegi ulttyq joba jaıynda baıandaldy. Onyń quramyna eki baǵyt jáne 33 negizgi joba kiredi. Bul jobalar saýda bırjasy naryǵyndaǵy, elektr energııasy, aýyl sharýashylyǵy taýarlary, kólik, baılanys, IT qyzmet salalaryndaǵy kedergilerdi joıyp, onyń jalpyǵa teńdeı qol jetimdi bolýyn qamtamasyz etedi.
Qasym-Jomart Toqaevqa saýda bırjasy júıesiniń iske qosylǵany týraly aıtyldy. 2021 jyldyń 25 naýryz kúni bıtýmnyń saýdasy bastalǵan. Al 31 naýryzda janar-jaǵarmaı, sáýir aıynyń basynda kómir saýdaǵa túse bastaıdy. Bul óz kezeginde naryqtyń ashyqtyǵyn qalyptastyryp, oǵan boljam jasaý tıimdiligin arttyra túsedi jáne naqty naryq baǵamyn alýǵa múmkindik beredi. Jaqyn arada Qazaqstan Respýblıkasy Bırja komıtetinde Ahýal ortalyǵy jumys isteı bastaıdy. Memleket basshysy un naryǵynyń ereksheligin jáne onyń eksporttyq áleýetin eskere otyryp, undy bırjalyq taýarlardyń tizimine qosýǵa erte dep sheshti.
Serik Jumanǵarın Memleket basshysynyń jerasty joldarynyń qol jetimdiligine taldaý júrgizý jónindegi tapsyrmasyn oryndaý barysynda vagondardy qalyptastyrýdy, temir joldardy jóndeý merzimderin retteıtin qaǵıdalar ázirlengenin, osy aptada monopolııaǵa qarsy komplaens aktisi jasalatynyn, sondaı-aq, barlyq joldarǵa balama tasymaldaýshylardy jiberý qamtamasyz etilgenin aıtty.
Qazirgi ýaqytta Básekelestikti qorǵaý jáne damytý agenttigi «Bogatyr Kómir» jaýapkershiligi shekteýli seriktestigine, «Eır Astana» aksıonerlik qoǵamyna, «Skat» aksıonerlik qoǵamyna qatysty, sondaı-aq, dárilik zattar naryǵyndaǵy monopolııaǵa qarsy tergeýler júrgizip jatyr.
Sonymen qatar Memleket basshysy básekelestikti qorǵaý jónindegi jańa zań jobasymen tanysty.
Prezıdent básekelestikti odan ári damytýǵa, quqyq qorǵaý organdarymen ózara is-qımyldy jaqsartýǵa, dárilik zattar men áleýmettik mańyzy bar azyq-túlik taýarlary naryqtaryn retteýge qatysty birqatar tapsyrma berdi.
