Keshe Ortalyq kommýnıkasııalar qyzmetinde ótken brıfıngte Qarjy mınıstrligi Memlekettik kirister komıteti departamentiniń dırektory Azamat Sadyqov komıtet pen IIM Ákimshilik polısııa komıtetiniń arasynda vedomstvolyq aqparattyq júıelerdi birizdendirý júrip jatqanyn atap ótti. «Memlekettik kirister komıteti «Salyqtyq ákimshilendirýdi reformalaý» jobasy sheńberinde «Integrasııalanǵan derekter bazasy» aqparattyq júıesinde «Jergilikti salyqtar» kishi júıesin ázirledi. Sonyń aıasynda eki jyl boıy kólik salyǵyn esepteý jumystary júrgizildi. Tólemderdi esepteý kezinde Ákimshilik polısııanyń aqparattary paıdalanyldy», deıdi ol.
Turǵyndarǵa tıimdi e-Salyq Azamat mobıldi qosymshasyn kez kelgen azamat paıdalana alady. Ol úshin uıaly telefonǵa qosymshany júktep alsa jetkilikti. Júıe arqyly salyq tóleýshiler qansha qaryzy baryn jáne múlik, jer, kólik quraldary jóninde málimetterdi teksere alady. «Kólik salyǵy týraly derekter «Aldyn ala tólemder» bóliminde ornalasqan. Mobıldi qosymshaǵa kirý úshin azamattardyń telefon nómirinde jeke sáıkestendirý nómiri tirkelgen bolýy kerek. Bul salyq tóleýshiniń jeke deregin qorǵaý, qaýipsizdikti qamtamasyz etý maqsatynda engizilgen. Sodan keıin daıyn turǵan rekvızıtter arqyly ózińizge qansha salyq eseptelgenin bilýge bolady», deıdi A.Sadyqov.
Komıtet ókiliniń aıtýynsha, qolǵa alynǵan sıfrlandyrý jumystary saladaǵy birshama kem-ketikti túzeýge múmkindik beredi. Mysaly, baıaǵyda satylyp ketken kóliktiń salyǵyn burynǵy ıesiniń moınyna jazý sııaqty keleńsizdikter bolmaıdy dep sendirdi mamandar. Memlekettik kirister komıteti óndiristik emes tólemderdi ákimshilendirý basqarmasy basshysynyń orynbasary Oljas Otardyń sózinshe, eger birneshe jyl buryn kólik satylyp ketken bolsa, soǵan qaramastan burynǵy ıesine salyq tóleý týraly habarlama kelse, onda E-Salyq-Azamat qosymshasyndaǵy túzetý qyzmetin paıdalanýǵa bolady. Qazirgi ýaqytta bul túzetý qyzmetin 11 myńnan astam adam qoldanyp, málimetterdi ózgertken. «Eger kólikti kelisimshart arqyly satyp, esepten shyǵarǵan bolsańyz, onda ony ýákiletti organnyń esebinen shyǵarýǵa bolady. Al senimhat arqyly satylǵan kólik burynǵy ıesiniń atynda qala beredi. Memlekettik tirkeý kimniń atynan júrgizilse, sol azamatta qalady. Sondyqtan ýákiletti organǵa baryp, kólikti esepten shyǵarý kerek. Sonymen qatar júrmeıtin, jaramsyz kóliktiń salyǵyna baılanysty kóptegen azamattan shaǵym túsip jatady. Mundaı jaǵdaıda paıdalanbaıtyn, isten shyqqan kólikti óz menshigińiz retinde esepten shyǵaryp tastaǵanyńyz jón», deıdi O.Otar.
Mamandardyń aıtýynsha, salyq tóleýshiniń bir qaladan ekinshi qalaǵa turǵylyqty mekenjaıy aýysqan jaǵdaıda salyq tóleý júıesi de avtomatty túrde aýysady. Kólik salyǵy burynǵy mekenjaı boıynsha tólenip qoısa, onda júıeni baqylap otyrǵan salyq qyzmetkerleri túzetý engizip, jańarǵan derekterdi jańa mekenjaıǵa jiberedi.
Basqa jaqqa kóshken kezde kóliktiń memlekettik nómirin aýystyrý mindetti emes. Kólik salyǵy turǵylyqty jeri boıynsha esepteledi.
«Salyqty ýaqtyly tólep otyrý – ár azamattyń mindeti. Merziminde tólenbegen salyqqa qosymsha ústemeaqy júretinin jáne tólenbeı qalǵan salyq shekten asyp ketse, shetelge shyǵý da múmkin bolmaıtynyn eskerte keteıik. Jeńil kólik salyǵynyń mólsheri qozǵaltqyshtyń kólemine, al júk kólikteri úshin júk kóterý salmaǵyna, avtobýstar úshin otyratyn oryndar sanyna baılanysty bolady. Al motosıklder úshin kólik salyǵy qozǵaltqyshtyń qýatyna baılanysty esepteledi», deıdi mamandar.
