Qyzylordanyń týmasy Jannur Nııazbekova Qazaq ulttyq agrarlyq ýnıversıtetinde Veterınarııalyq medısına mamandyǵy boıynsha bilim alǵan. Qazaqstan Prezıdenti stıpendııasynyń ıegeri atanǵan. Magıstratýrada oqyp júrip, Qazaq ulttyq agrarlyq ýnıversıtetinde professordyń assıstenti qyzmetin atqarǵan.
2017 jyly «Jibek joly» baǵdarlamasy boıynsha Qytaı Halyq Respýblıkasy Shensı provınsııasy Sıenıan qalasyndaǵy Soltústik-batys aýyl jáne orman sharýashylyǵy ýnıversıtetine Profılaktıkalyq veterınarııalyq medısına mamandyǵy boıynsha PhD doktorantýraǵa oqýǵa túsken. Jas ǵalym búginde «Eshki súti quramyndaǵy mıkrorganızmderdiń popýlıasııasy jáne onyń ishek mıkroflorasyna áseri» taqyrybyn zertteýde.
Jannur oqýmen qatar, qoǵamdyq ómirde de belsendi eken. Ol úkimet bastaǵan baǵdarlamalarǵa qatysyp, tájirıbe jınaqtaýǵa tyrysatynyn aıtty. «Men oqyp jatqan ýnıversıtet Shensı provınsııasyna qarasty Jenba jáne Heıan aýyldyq okrýgterine kedeılikpen kúresý jáne aýyldardy jandandyrý maqsatynda kómek beredi. Ýnıversıtet stýdentteri de sharaǵa atsalysyp, jarty ne bir jyl boıy sol aýyldyń damýyna kómek berip, jumys isteıdi. Men de 2020 jyldyń maýsym aıynda óz mamandyǵym boıynsha aýyl sharýashylyǵynyń damýyna seleksııa boıynsha úles qostym. Sonymen birge aýyl oqýshylaryna aǵylshyn tilin úırettim. Aýyl turǵyndary buryn-sońdy sheteldik kórmegen, sondyqtan basynda menen uıalatyn. Qytaı tilin meńgergenimdi, aýyl sharýashylyǵy boıynsha bilim alǵanymdy bilip, ózderin mazalaǵan suraqtaryn qoıdy. Men aýyl sharýashylyǵy – fermerler úshin kedeılikten arylý jáne baı bolý úshin mańyzdy sala ekenin aıttym. Ol úshin aýrýdyń aldyn alý jáne oǵan qarsy kúres sharalaryn júrgizý kerek. Eger de mal ınfeksııalyq aýrýlarǵa shaldyǵatyn bolsa, ol ekonomıkalyq shyǵynǵa ákeledi. Al ony boldyrmaý úshin eshki qoralaryn, azyq qoımalaryn taza jáne qurǵaq ustaý, únemi tazalap otyrý, ekologııalyq-sanıtarlyq menedjmentti retteý kerek», deıdi Jannur.
Otandasymyz dezınfeksııa jasaý men ártúrli dezınfeksııalaý quraldaryn qoldanýdy da úıretipti. «Men qatysqan kedeılikti joıýdy maqsat etken baǵdarlama týraly kóptegen buqaralyq aqparat quraly, sonyń ishinde Sınhýa agenttigi jazdy. Tipti meniń jumysym agenttik saıtynyń birinshi betinen oryn aldy. Sınhýa aqparattyq agenttiginiń VLOG-yn el boıynsha 69 buqaralyq aqparat quraly qaıta basyp shyǵardy jáne vıdeo 1,5 mıllıonnan astam qaralym jınady», deıdi otandasymyz.
Jannurdyń aıtýynsha, ýnıversıtet prezıdenti stıpendııasyn alýǵa sol jaqtaǵy muǵalimi sebepshi bolypty. Talapty shákirtin laıyqty dep sanap, ózi usynǵan. «2020 jyldyń qazan aıynda 2020-2021 oqý jylyna arnalǵan prezıdenttik stıpendııaǵa ótinish berý bastalǵanyn bilgende Chen esimdi muǵalim meni usynǵan bolatyn. Talaptar boıynsha oqý úlgerimi, ıaǵnı GPA 75 baldan joǵary bolý kerek, meniń GPA kórsetkishim 95 ball boldy. Taǵy bir talap – ımfakt-faktory joǵary ǵylymı jýrnaldarda birinshi avtor bolyp maqala jarııalaý. Jaqynda ǵana shveısarııalyq IF 2.323 «Animals» jýrnalynda maqalam jarııalanǵan bolatyn. Qytaı tilin bilý deńgeıin anyqtaıtyn HSK testi bar. Sol emtıhanda qajet deńgeıdi dáleldeýiń kerek. Úmitker ýnıversıtetishilik jáne de basqa is-sharaǵa, halyqaralyq konferensııalarǵa qatysýy kerek. Meniń kandıdatýram barlyq talaptarǵa saı keldi. Ýnıversıtet boıynsha 13 sheteldik stýdent tapsyryp, ekeýimiz jeltoqsanda prezıdenttik stıpendııa ıegeri atandyq», deıdi jas ǵalym.
«2020 jyldyń jeltoqsan aıynda el ishinde bedeldi sanalatyn «Eń úzdik stýdent» júldesine de ótinish qabyldaý bolyp jatqanyn estip, bizdiń ýnıversıtetten basshylyq jeti stýdentti usynǵan bolatyn. Joǵaryda tizilgen talaptarǵa qosa, Bilim bólimine qyzyq ári maǵynaly bir maqala jazý kerek. «Osy júldeni uttyń» degen hat kelgende eriksiz jylap jiberdim. Bul júldeni alý sheteldik stýdent turmaq, Qytaı azamattarynyń kóbiniń qolynan kelmeıdi. Oqýǵa túsken jyly pákistandyq stýdenttiń osy júldeni alyp jatqanyn kórip, ony buryn-sońdy qazaqstandyq stýdent almaǵanyn estip, eki jyldan keıin men de osy júldeni alamyn, qazaqstandyq stýdent «Eń úzdik stýdent» bolady dep ishteı ýáde bergenmin. Bul meniń ǵana emes, bar qazaqtyń jeńisi dep bilemin», deıdi qýanyshymen bólisken Jannur.
Qytaıda bilim alyp júrgen qazaqstandyqtar otandastarynyń jeńisine birge qýanypty. Jannur bir jyldan soń oqýyn támamdaıdy. Úzdik stýdenttiń elge oralyp, shetelde jınaǵan tájirıbesi men bilimin el damýyna jumsasam degen tilegi bar.
