Belgili bolǵandaı, tarıhy sonaý 1956 jyldan bastalatyn Torǵaı boksıt ken basqarmasy 90-shy jyldary turalap qalǵan. Kásiporyn 1994 jyly ERG-diń ınvestor bolyp kelýimen qaıtadan eńse tiktegen. 1996 jyldyń tamyz aıynda Torǵaı boksıt ken basqarmasy «Qazaqstan alıýmınııi» AQ quramyna endi. Kásiporyn 60 jylda 1,5 mlrd tekshe metr taý-ken massasyn ıgerip, odan 80 mln tonnadan astam boksıt pen 20 mln tonnadan astam otqa tózimdi saz alynǵan.
– Torǵaı boksıt ken basqarmasyn jabý týraly sheshimdi qabyldaý ońaı bolǵan joq. Bul elimizdegi alıýmınıı óndirisiniń irgesin qalaýǵa negiz bolǵan kásiporyn. Alaıda 65 jylda kenishtegi qor tolyq ıgerilip, sarqyldy. Sondyqtan 2017 jyldan bastap kásiporyn jumysyn barynsha jaýapkershilikpen toqtatý isin qolǵa aldyq, – deıdi Eýrazııalyq Toptyń basqarma tóraǵasy Serik Shahajanov.
Derekterge súıensek, 2016 jyldyń ózinde mundaǵy boksıt pen otqa tózimdi sazdyń óndiris kólemi eki ese azaıǵan. Osylaısha, osydan tórt jyl buryn kásiporyndy taratý jumysy birtindep júrgizile bastady.
2020 jyldyń birinshi qańtaryndaǵy derek boıynsha Torǵaı boksıt ken basqarmasyndaǵy qyzmetkerlerdiń jalpy sany 681 adam bolatyn. Bul ERG kásiporyndary qyzmetkerleriniń 1 paıyzyna nemese Arqalyq qalasy (2019 jylǵy turǵyndar sany – 41 371 adam) turǵyndarynyń 1,4 paıyzyna teń.
Jumysshylardy jańa jumyspen qamtý úshin Eýrazııalyq top áýeli «Atameken» ulttyq kásipkerler palatasymen birlesip skrınıng júrgizgen. Budan bólek, Arqalyq qalasynda áleýmettik zertteýler jasalǵan. Qyzmetkerlerdiń nıet-tilekteri men bolashaqta jumysqa ornalasýǵa qatysty josparyn bilý úshin arnaıy saýaldama júrgizilgen.
«Atameken» ulttyq kásipkerler palatasymen birlesken joba jemisin berip, Torǵaı boksıt ken basqarmasynyń qyzmetkeri Vıktor Sýrovsev jóndeý jumystarymen aınalysatyn ARQALYQREMSERVIS JShS qurdy. Osylaısha, ol burynǵy 87 áriptesin jumyspen qamtydy. Bul rette Eýrazııalyq top bıznestiń damýyna barynsha septesý úshin jóndeý mehnıkalyq jabdyqtary ýchaskesiniń negizgi ǵımaraty men ashanasyn, segiz tehnıkany jańadan qurylǵan kásiporynnyń ıeligine qaıtarymsyz bergenin aıta ketken jón.
Byltyr Arqalyq qalasynda Torǵaı boksıt ken basqarmasynyń qyzmetkerleri úshin arnaıy bos oryndar jármeńkesi uıymdastyrylypty. Onda qaladaǵy 15 kompanııa men ERG-diń ózge óńirdegi kásiporyndary qyzmetten bosaıtyndarǵa jańa jumys oryndaryn usynǵan. Nátıjesinde, 84 maman jumysqa ornalasty. Taǵy 123 qyzmetker ERG-diń ózge kásiporyndaryna – Krasnooktıabr boksıt ken basqarmasyna, Sokolov-Sarybaı ken baıytý kombınaty men «Shubarkól kómirge», Pavlodar alıýmınıı zaýytyna jumysqa ornalasty. 326 qyzmetkermen eńbek kelisimsharty buzylyp, 126 qyzmetker ken basqarmasynda sońǵy jumystarǵa jumyldyrylǵan.
Kompanııa óz mindettemesin oryndap, 180 gektar jerdi qaıta qalpyna keltirmek. Onyń 75 gektaryn ARQALYQREMSERVIS kompanııasy óńdemek. Buǵan deıin kásiporyn menshiginde bolǵan ári jergilikti atqarýshy organ tarapynan qyzyǵýshylyq týdyrǵan kompanııanyń aktıvteri Arqalyq qalasy ákimdigi men kásipkerleriniń balansyna tegin berilmek. Máselen, ken basqarmasynyń ǵımaraty jóndelip, onda aımaqtyq aýrýhana ashý kózdelgen. Taǵy bes nysan bıznesin keńitkisi kelip otyrǵan «Alıýmınstroı» JShS men «Kereıt» syndy jeke kásipkerlerdiń qolyna ótpek. Temir jol jabdyǵyn jóndeý ýchaskesi ýaqyt óte kele qazir jalǵa alyp otyrǵan ARQALYQREMSERVIC JShS-nyń ıeligine ótedi.
