Qazaqstanda koronavırýstyń taralýyna jol bermeý jónindegi vedomstvoaralyq komıssııa el aımaqtaryndaǵy epıdemııalyq jaǵdaıdy baǵalaý matrısasyn jarııalady. 2021 jyldyń 29 naýryzyndaǵy jaǵdaı boıynsha Nur-Sultan, Almaty qalalary men Atyraý jáne Batys Qazaqstan oblystary «qyzyl aımaqta» tur. «Sary aımaqta» Aqtóbe, Almaty jáne Qaraǵandy oblystary ornalasqan. Qalǵan barlyq óńir – «jasyl aımaqta».
Almatyda koronavırýstyń «ońtústikafrıkalyq» jáne «brıtanııalyq» shtamdary tirkelýde. Bul týraly Ortalyq kommýnıkasııalar qyzmetinde ótken onlaın baspasóz máslıhaty barysynda Densaýlyq saqtaý mınıstrligi Qoǵamdyq densaýlyq saqtaý ulttyq ortalyǵy basqarma tóraǵasynyń orynbasary Aınagúl Qýatbaeva málimdedi.
«Álemdegi epıdemııalyq ahýalǵa sholý jasap qarasaq, sońǵy 15 kúnniń ishinde jaǵdaıdyń turaqsyzdyǵy baıqalady. Búginde 127 mln-nan astam vırýs juqtyrý jaǵdaıy tirkelgen bolsa, onyń 2 mln-nan astamy qaıtys bolǵan. Qazaqstanda koronavırýs ınfeksııasynyń sırkýlıasııasyn jáne qaýip-qater tobynyń arasynda qandaı qater baryn anyqtaý maqsatynda zertteý jumystary júrgizilip keledi. Bıyl elimizde ekspress-PTR skrınıng ádistemesi engizilgen. Osy zertteý nátıjeleriniń byltyrǵy jáne bıylǵy naýryz aıyndaǵy jaǵdaıyn eskerer bolsaq, álem elderinde anyqtalyp jatqan koronavırýstyń «brıtanııalyq», «brazılııalyq» jáne «ońtústikafrıkalyq» shtamdary anyqtalmaǵan bolatyn. Alaıda sońǵy málimetterge súıensek, Almatydaǵy naýqastar arasynda «ońtústikafrıkalyq» jáne «brıtanııalyq» shtamdar anyqtalǵan», dedi A.Qýatbaeva.
Ol naýqastan shtamdar anyqtalsa da, anyqtalmasa da azamattar qarapaıym saqtyq sharalaryn esten shyǵarmaǵany jón ekenin eske saldy. Onyń aıtýynsha, koronavırýsty jeńýdegi eń tıimdi ádis – vaksına.
«Búginde álemniń birqatar elinde koronavırýsqa qarsy vaksınalaý sharalary júrgizilip jatyr. Qazaqstanda vaksınanyń birinshi komponentimen qamtylǵan azamattar sany 122 701-ge jetse, ekinshi komponentimen qamtylǵan azamattar sany 31 422-ge jetken. Osy oraıda Reseıden alynǵan Spýtnık V vaksınasy eń tıimdi ári qaýipsiz vaksınalardyń qataryna jatady. Bul vaksınanyń taǵy 150 myń dozasy ákelinedi dep kútilýde», dedi ol.
Densaýlyq saqtaý mınıstrligi Qoǵamdyq densaýlyq saqtaý ulttyq ortalyǵynyń «Sanıtarııalyq-epıdemıologııalyq saraptama jáne monıtorıng ǵylymı-praktıkalyq ortalyǵy» fılıaly dırektorynyń m.a. Manar Smaǵul «brıtanııalyq shtamda» ólim-jitim qaýpi joǵary ekenin aıtty.
Dúnıejúzilik densaýlyq saqtaý uıymynyń málimetteri boıynsha 2021 jylǵy 26 naýryzdaǵy SARS-CoV-2 vırýsynyń «brıtanııalyq shtamy» álemniń 125 elinde, «ońtústikafrıkalyq shtamm» 75 elinde, «brazılııalyq shtamm» 41 elinde anyqtaldy. Iаǵnı bir apta ishinde «brıtanııalyq shtamm» álemniń taǵy 7 elinde anyqtaldy. Vırýstyń mýtasııa yqtımaldyǵy adamdardyń juqtyrý jıiliginiń joǵarylaýymen artady.
– Koronavırýstyń jańa shtamdary men bastapqy shtamnyń belgileri birdeı, ıaǵnı vırýstyń bul túrin juqtyrǵanda da qyzba, jótel jáne dám men ıis sezý múmkindigi joǵalady. Ulybrıtanııa mamandarynyń aıtýynsha, koronavırýstyń jańa «brıtanııalyq shtamy» jótel, qatty sharshaý, bulshyqettegi álsizdik sııaqty belgilermen sıpattalady, biraq ıis sezý az baıqalady, – dedi Manar Smaǵul.
Manar Asyrqyzynyń aıtýynsha, DDU málimetterine sáıkes jańa shtamdar burynǵyǵa qaraǵanda 41%-ǵa joǵary reprodýktıvti bolyp keledi. Iаǵnı vırýstyń bul túrinde adamdarǵa barynsha vırýs juqtyrý qabileti, sondaı-aq «basqa aınalymdaǵy shtamdardy tez almastyrý qabileti» joǵary ekeni baıqalǵan. «Brıtanııalyq shtamda» aýrýhanaǵa jatqyzý, aýyr aǵym jáne ólim-jitim qaýpi joǵary ekeni anyqtalyp otyr.
«Sol sebepti vırýstyń taralýyna tosqaýyl qoıý úshin qajetti sharalardyń barlyǵyn qoldaný kerek. Onyń ishinde vaksınalaý da bar. Búginde respýblıkada COVID-19-ǵa qarsy vaksınalaý qoljetimdi. Densaýlyq saqtaý mınıstrliginiń málimetinshe, birinshi sáýirden bastap vaksınalaýǵa jatatyn kontıngent kóbeıedi. О́ıtkeni aıdyń basynda qosymsha 150 myń doza jáne bir aıdyń ishinde shamamen 1 mln doza jetkizý josparlanýda», dedi ol.
Aıta ketetin jaıt, elimizde ótken táýlikte 788 adam koronavırýs indetinen emdelip shyqty. Jalpy jazylǵandar sany – 217 168.
