Akkredıtteýdiń táýelsiz qazaqstandyq ortalyǵy Aqtaý gýmanıtarlyq-tehnıkalyq ýnıversıteti men «Astana» ýnıversıtetine qabyldaǵan sheshimi týraly resmı hat jiberdi.
«Bizdiń uıym oqý oryndarynyń bilim berý baǵdarlamalaryn saraptap, sapa standarttaryna sáıkestigin anyqtaýǵa jáne olarǵa akkredıtasııa berý jumystaryna jaýapty. Atalǵan eki joǵary oqý orny bizdiń sarapshylarymyzdy oqý ǵımarattaryna kirgizbeı, akkredıtteýden keıin júrgiziletin monıtorıng jumystaryna kedergi jasady. Sondyqtan biz olardyń akkredıtasııalaryn keri qaıtaryp alý týraly sheshim qabyldadyq», dedi «Akkredıtteýdiń táýelsiz qazaqstandyq ortalyǵy» kommersııalyq emes uıymnyń dırektory Begaly Halmuratov.
Aıta keteıik, bul joǵary oqý oryndary buǵan deıin Bilim jáne ǵylym mınıstrliginiń ókilderine de josparly tekserýler júrgizýge kedergi keltirgen bolatyn. Josparly tekserý jumystary bolatyny týraly aldyn ala habardar bolǵanyn eskerý qajet. Mınıstrlik pen atalǵan joǵary oqý oryndary arasyndaǵy sot prosedýralarynyń júrgizilip jatqanyna bir jarym jyl boldy.
Akkredıtteý jáne reıtıngtiń táýelsiz agenttigi de (NAAR/IAAR) akkredıtteýden keıingi monıtorıng qorytyndysy boıynsha Ortalyq Azııa ýnıversıtetiniń akkredıtasııasyn keri qaıtaryp aldy.
«Akkredıtteý jáne reıtıngtiń táýelsiz agenttiginiń (IAAR) rásimderine sáıkes bilim berý uıymdary akkredıtteýden keıingi monıtorıngten ótýi tıis. Bul monıtorıng kezinde oqý ornyna berilgen usynymdardyń oryndalýy tekseriledi. Ortalyq Azııa ýnıversıteti akkredıtteýden keıingi monıtorıng rásiminen ótýden bas tartty jáne IAAR usynymdarynyń oryndalýy týraly esepti bermedi. Osyǵan sáıkes IAAR Akkredıtteý Keńesi joǵary oqý ornynyń akkredıtteý týraly kýáligin qaıtaryp alý týraly sheshim qabyldady», dedi «Akkredıtteý jáne reıtıngtiń táýelsiz agenttigi» kommersııalyq emes uıymnyń bas dırektory Alına Jumaǵulova.
Sondaı-aq «Atameken» ulttyq kásipkerler palatasynyń adamı kapıtaldy damytý departamentiniń dırektory Azamat Beısenbenov jumys berýshiler bul joǵary oqý oryndarynyń bilim sapasyna qanaǵattanbaıtynyn atap ótti. Oqý ornynda bolashaq mamandarǵa bilim men kásibı daǵdylar qajetti deńgeıde berilmeıdi.
«Bul ýnıversıtetke qatysty biraz dúnıeni aıtýǵa bolady. Mysaly, joǵary oqý oryndary boıynsha jasalǵan 2020 jylǵy reıtıng qorytyndysyn alyp qaraıyq. Ortalyq Azııa ýnıversıtetiniń bilim berý baǵdarlamalarynyń sapasy men ózektiligine jumys berýshilerdiń qanaǵattaný kórsetkishi nebári 32 paıyzdy quraıdy. Sarapshylar joǵary oqý orny usynyp otyrǵan bilim berý baǵdarlamalary aıtarlyqtaı pysyqtaýdy talap etetinin atap ótti. Ýnıversıtette oqytylatyn pánderdiń mazmuny basqa pánderden sózbe-sóz kóshirilgen, aıyrmashylyq tek pán ataýlarynda. Mundaıǵa jol berýge bolmaıdy. Ortalyq Azııa ýnıversıtetine qatysty qatań sharalar qabyldaý qajet», dedi «Atameken» UKP departament dırektory Azamat Beısenbenov.
Bilim jáne ǵylym mınıstrligi, akkredıtteý agenttikteri jáne jumys berýshiler joǵary bilim sapasyn arttyrý boıynsha ortaq maqsattarǵa qol jetkizý úshin birlesip jumys istep jatyr.
«Esterińizde bolsa, dál osy úsh joǵary oqý orny bizge de tekserý jumystaryn júrgizýge kedergi jasady. Osyǵan deıin júrgizilgen tekserýler nátıjesinde bul oqý oryndarynda birqatar buzýshylyq anyqtalǵan bolatyn. Akkredıtasııalary boıynsha da problemalary boldy. О́tken jyly túlekteri dıplomdaryn ýaqytyly ala almaı qınalǵan edi. Saldarynan magıstratýraǵa oqýǵa túsý nemese jumysqa turýǵa baılanysty qıyndyqtarǵa tap boldy. О́kinishke oraı, bul joǵary oqý oryndarynda oqýyn jalǵastyryp jatqan stýdentter bul jaǵdaıdan sabaq almady. Bıyl da kadrlardy daıyndaý sapasyna qatysty sol máseleler kóterilip jatyr. Endi bul oqý oryndary buǵan deıin júrgizgen tekserýlerimizdiń nátıjeleri boıynsha tıisti sheshim qabyldaýymyzǵa kedergi keltirip, túrli amaldarymen ýaqytty sozyp jatyr», dedi QR BǴM Bilim jáne ǵylym salasyndaǵy sapany qamtamasyz etý komıtetiniń tóraıymy Gúlzat Kóbenova.
