Otyrysta «Qazaqstan Respýblıkasynyń 2015-2025 jyldarǵa arnalǵan sybaılas jemqorlyqqa qarsy strategııasyn iske asyrý barysy týraly» jáne Memleket basshysynyń tóraǵalyǵymen ótken 2020 jylǵy 19 tamyzdaǵy «Sybaılas jemqorlyqqa qarsy is-qımyl jónindegi sharalar týraly» Keńestiń hattamasyn iske asyrý barysy týraly» máseleler qaraldy.
Jıyn barysynda Sybaılas jemqorlyqqa qarsy is-qımyl agenttigi, Bilim jáne ǵylym mınıstrligi, Sıfrlyq damý, ınnovasııalar jáne aeroǵarysh ónerkásibi mınıstrligi basshylarynyń baıandamalary tyńdaldy.
Qazaqstanda júrgizilip jatqan sybaılas jemqorlyqqa qarsy reformalarǵa Transparency International uıymynyń oń baǵa bergeni atap ótildi. 2020 jyldyń qorytyndysy boıynsha sybaılas jemqorlyqty qabyldaýdyń álemdik Indeksinde bizdiń elimiz 100-den 38 ball aldy, bul sońǵy jyldardaǵy eń úzdik nátıje sanalady.
Sonymen birge Qazaqstan Respýblıkasynyń 2025 jylǵa deıingi Ulttyq damý jospary jáne Qazaqstan Respýblıkasynyń 2025 jylǵa deıingi Jalpyulttyq basymdyqtary boıynsha 2025 jylǵa qaraı elimizde sybaılas jemqorlyqty qabyldaý Indeksin 45 ballǵa jetkizý kózdelgendikten, osy baǵyttaǵy jumys qarqyny tómendemeýge tıis.
Birinshi másele boıynsha Qazaqstan Respýblıkasy Tuńǵysh Prezıdenti – Elbasynyń 2014 jylǵy jeltoqsandaǵy Jarlyǵymen bekitilgen Sybaılas jemqorlyqqa qarsy strategııany iske asyrý jónindegi 2018-2020 jyldarǵa arnalǵan is-sharalar josparynyń oryndalýyn aıaqtaý talqylandy.
Onyń aıasynda memlekettik qyzmet, qoǵamdyq baqylaý, kvazımemlekettik jáne jeke sektorlar, sot jáne quqyq qorǵaý júıeleri sybaılas jemqorlyqqa qarsy mádenıetti damytý jáne halyqaralyq yntymaqtastyq salalaryndaǵy is-sharalar pysyqtaldy.
Bul rette 2015-2025 jyldarǵa arnalǵan sybaılas jemqorlyqqa qarsy strategııany iske asyrýdyń ekinshi besjyldyq kezeńine kóshý jáne 2021-2023 jyldarǵa arnalyp ázirlenip jatqan jospardy sapaly oryndaý qajettigi aıtyldy.
Memleket basshysynyń 2020 jylǵy 19 tamyzdaǵy tapsyrmalary boıynsha jaýapty memlekettik organdar 26 tapsyrmanyń 17-siniń oryndalýy týraly baıandady. Kóptegen tapsyrmalar sybaılas jemqorlyqqa qarsy birqatar bastamalarǵa muryndyq bolsa, olardyń keıbireýleri iske asyryldy.
Osyǵan baılanysty, memlekettik organdarǵa sybaılas jemqorlyq deńgeıin tómendetýge naqty áser etetin is júzinde qoldanylatyn sharalardy qabyldaýdy kózdeı otyryp, baqylaýda turǵan tarmaqtardy sapaly oryndaýdy jalǵastyrý usynyldy.
Otyrys qorytyndysy boıynsha Qyrymbek Kósherbaev qaralǵan máseleler boıynsha naqty tapsyrmalar berdi, olardyń oryndalýy baqylaýǵa alyndy.
