Bul tehnologııa baǵdarshamdy qyzyldan jasylǵa aýystyrý arqyly reanımobılderge «jasyl dáliz» usynady. Qazirgi ýaqytta jabdyqtar reanımasııalyq brıgadalary bar birqatar jedel medısınalyq kómek mashınalaryna ornatyldy.
Jedel járdemge arnalǵan bul tehnologııa pılot retinde «City Transportation Systems» kompanııasymen birlesip densaýlyq saqtaý salasyn sıfrlandyrý aıasynda 2018 jyly engizilgen. Tehnologııa JMK avtomobılderine ornatylǵan aqparattyq júıeler men arnaıy jabdyqtardy ıntegrasııalaý arqyly júrgizýshiler qajet bolǵan jaǵdaıda baǵdarsham sıgnaldaryn qyzyldan jasylǵa aýystyra alatyndyǵymen erekshe.
«Atalǵan tehnologııany engizý brıgadanyń naýqasqa jetý ýaqytyn aıtarlyqtaı qysqartady. Osylaısha jedel medısınalyq kómekti ýaqytyly jáne sapaly kórsetý boıynsha kórsetkishter jaqsardy. Ary qaraı qala ákimdigi men Qoǵamdyq densaýlyq saqtaý basqarmasy sanıtarlyq avtokólikterdiń bárin osy tehnologııamen jabdyqtaýdy jalǵastyrady», delingen basqarma habarlamasynda.
«Jasyl baǵdarsham» jedel járdem kóligin súıemeldeýdiń jaǵymdy jaqtaryn kórsetti. Atap aıtqanda, júrý ýaqyty orta eseppen 30%-ǵa qysqardy.
Osyǵan deıin gospıtalǵa jetý ýaqyty 14 mınýtty alsa, bul tehnologııanyń kómegimen jedel járdem kóligi mejeli jerge, sondaı-aq 11 km nemese odan da uzaq jolǵa 10 mınýtqa jeter-jetpes ýaqytta jetedi.
«Shaqyrýǵa asyǵyp bara jatqanda nemese pasıentti aýrýhanaǵa múmkindiginshe jedel jetkizý kezinde bul tehnologııa biz úshin taptyrmaıtyn kómek bolyp sanalady. Sebebi biz úshin ár mınýt qundy. Ásirese, keshki keptelis ýaqytynda mańyzdy ról atqarady», deıdi JMMK reanımobıl júrgizýshisi Ashat Aqtaev.
Qala ákimi Altaı Kólginov 2020 jyldyń kúzinde «103» kólik quraldaryn ıntellektýaldy kólik júıesine tolyqqandy biriktirýdi qamtamasyz etý máselesin tapsyrǵan bolatyn.
