Bıyl da qys boıy qasattanyp jatqan qardyń azǵantaı kólemi qara jerdiń qoıny-qonyshyn ylǵalǵa toltyrýǵa jete me dep alańdaı bastaǵan aýyl sharýashylyǵynyń mamandaryna aqjarylqap qýanysh bolǵan qalyń qar naýryzdyń sońyn ala bir-aq kúnde tústi. Álbette, qardyń kúlimdegen kóktemniń kúninde baýyrynan erigeni bárine qolaıly. Dıqanǵa da, mal baqqan sharýaǵa da. О́ıtkeni ylǵal jipsigen topyraqqa jaqsy sińedi, egin qaý etip kóterilip, bitik shyǵady. Tebindegi maldyń tuıaǵyn mújip, shashasyn qajaıtyn muz qatpaǵany sharýaǵa qut. Byltyr da qardyń qalyń túskeni jerdiń de, eldiń de berekesin arttyryp, 18 mln tonna astyq aldy. Bıyl da bul mejege jetken abzal.
Qystaǵy qar jerge yrys bolǵanymen, kókte baılaý, jerde turlaý joq, kún kúrt jylynsa, qalyń qar saı-salany sýǵa toltyryp, qaýip-qaterge de aınalatyny belgili. Qazir kóktemniń kúni kúlimdep tur. Iаǵnı beıqam bolýǵa bolmaıdy. Osy oraıda, elimizdiń sýly-nýly óńirleri tasqynǵa tosqyn qoıýǵa tas-túıin ázir me degen saýal qylań beredi. Ádette apattyń saldarymen kúreskennen góri, aldyn alǵan abzal. Biraq apat aıtyp kelmeıdi. Jylda ár óńirde sý basqan aýyldar, kúre joldar turǵyndarǵa qolaısyzdyq týdyryp, tipti barynan aıyryp ta jatady. Bul rette memleket barynsha kómektesip, qolushyn sozatyny anyq. Byltyr da Sardoba sý qoımasyndaǵy apattan zardap shekken túrkistandyqtarǵa tutas jańa aýyl salyndy. Álbette, apatqa jetkizbeı-aq qoısyn dep tileımiz. Sol sebepti jylda san soǵyp qalatyn jaýapsyzdyq bolmaýy úshin tıisti qurylymdar adamdary men arnaıy tehnıkasyn qanshalyqty saılap otyr?
Osy saýal tóńireginde tilshilerimizdiń daıyndaǵan toptamasyn 14-betten oqısyzdar.
