Kollajdy jasaǵan Záýresh SMAǴUL, «EQ»
Eń bastysy, KVI-ge qarsy erikti jappaı vaksınalaýdyń bekitilgen josparyna sáıkes, sýyq tizbekti saqtaý úshin muzdatqyshtarmen jabdyqtaýǵa erekshe nazar aýdarylyp otyr. Biz buǵan deıin de Almatyda indettiń kúrt órshýine mýtasııalanǵan shtamdardyń paıda bolýy (Ońtústik Afrıka, Brazılııa jáne brıtandyq) septesip otyrǵanyn jetkizgenbiz. Máselen, ótken aptada megapolıs zerthanalarynda 113 synamanyń mýtasııa yqtımaldyǵyna zertteýler júrgizilip, 63 synamada mýtasııanyń joǵary yqtımaldyǵy anyqtaldy, ol qala boıynsha orta eseppen 56 paıyzdy qurady. 113 synamanyń 31-inen brıtandyq shtamm anyqtaldy, ol 71 paıyzdy quraıdy. Sonymen qatar mýtasııalanǵan shtamdarda ınkýbasııa kezeńi qysqarǵany baıqalady. Bul 1 jasqa deıingi balalarǵa da qaýip tóndirip tur.
Vaksınalaýdyń 250 pýnkti ashylady
Qoǵamdyq densaýlyq basqarmasy ashylatyn vaksınalaý pýnktterin qajetti medısınalyq jabdyqtarmen jáne mamandarmen qamtamasyz etedi. Al qarjylyq shyǵyndardy esepteýdi Strategııa jáne bıýdjet basqarmasy júzege asyrady. Budan ózge, bıznes qaýymdastyq tasymaldaý, saqtaý, úı-jaı berý jáne vaksınalaý pýnktterin uıymdastyrýǵa tegin qoldaý kórsetedi.
Juma kúni qalaǵa koronavırýs ınfeksııasyna qarsy 21 850 doza vaksınanyń jetkizilgeni málim boldy. Sáýir-mamyr aralyǵynda Almaty vaksınanyń qosymsha 750 myń dozasyn alady.
Qala ákimi B.Saǵyntaev jalpy vaksınalaýdyń qalypty ómir saltyna oralýǵa jáne karantındik shekteýlerdi birtindep jeńildetýge múmkindik beretinin aıtty. Vaksına – aýrýdyń aldyn alýdyń eń senimdi ári barynsha tıimdi sharasy, ıaǵnı vaksına emdemeıdi, qorǵaıdy.
Medısınalyq aqparattyq júıe paıdalanyldy
Bastapqyda medısına qyzmetkerleri, mektep, ınternat muǵalimderi, áleýmettik mekemeler jáne polısııa qyzmetkerleri indetke qarsy egilgeni belgili. Bul sanattaǵy mamandardy vaksınalaý aıaqtalyp keledi. Qalada 2 sáýirden bastap sozylmaly aýrýlary bar dıspanserlik toptaǵy pasıentter vaksına ala bastady.
Epıdemıologter syrqaty bar almatylyqtardyń otandyq vaksınanyń 2 200 dozasyn alǵanyn jáne onymen sátti jumys istep jatqanyn aıtty. Mamandar vaksınany kvınkı isinýi bar, júkti jáne bala emizetin adamdarǵa jasaýǵa bolmaıtynyn eskertip otyr. Vaksınalaýǵa 18 jasqa deıingi balalar jiberilmeıdi. Sonymen birge koronavırýsqa qarsy vaksınany 63 jastan asqan adamdarǵa jasaýǵa ruqsat etiledi.
Dárigerler vaksınanyń úsh kún ishinde teris áseri bolýy múmkin ekenin, onyń asqyný emes ekenin jetkizdi. Bul – qaltyraý, deneniń syrqyraýy, dene temperatýrasynyń azdap kóterilýi.
– Bizdiń derekterimiz boıynsha, ekpe saldyrǵandardyń 25-30 %-da osy belgiler baıqalýda. Qalǵandarynan shaǵymdaný bolǵan joq. Aýyr belgileri de tirkelgen joq, – deıdi dáriger.
Halyqqa ekpe júrgizý 2 sáýirden bastaldy, oǵan deıin sozylmaly aýrýlary bar naýqastarǵa medısınalyq aqparattyq júıe arqyly shaqyrý jiberilgen bolatyn. Eki kúnde 1 300 adam egildi. Vaksına saldyrǵandar qatarynda qazaqstandyqtar ǵana emes, turǵylyqty meken-jaıy men tirkelgen medısınalyq uıymdaryna qaramastan, sheteldik azamattar da bar. Dárigerler vaksınalaýǵa qatysty turǵyndardy tolǵandyrǵan suraqtarǵa jaýap bere otyryp, ekpe eki komponentti bolǵandyqtan, eki ekpeniń arasyndaǵy aıyrmashylyq 21 kúndi quraıtynyn eske salyp otyr. Úzilisti 7 kúnge deıin úzýge ruqsat etiledi. Pasıent aýyryp qalǵan jaǵdaıda, 60 kúnge deıin úzilis jasaý múmkindigi bar. Vaksına alǵannan keıin ımmýnıtet ekinshi komponentti alǵannan keıin 42 kún ótken soń qalyptasady.
ALMATY
