Mınıstr atap ótkendeı, Qazaqstan Prezıdentiniń byltyrǵy jylǵy jeltoqsandaǵy Japonııaǵa sapary eki el arasyndaǵy strategııalyq seriktestiktiń damýyna tyń serpin berdi. Bıyl alǵashqy toqsanda Qazaqstan men Japonııa arasyndaǵy aýyl sharýashylyǵy ónimderiniń taýar aınalymy 75%-ǵa artty.
Aıdarbek Saparov otandyq óndirýshilerdiń japon naryǵyna ónim eksportyn ulǵaıtýǵa yntaly ekenin aıtty.
«Bizdiń elimizdiń eksporttyq áleýeti zor jáne ekologııalyq taza ári joǵary sapaly ónim jetkizý kólemin arttyrýǵa daıyn. Japonııaǵa eksporttalatyn ónim túrlerin keńeıtýge degen qyzyǵyýshylyǵymyz zor. Onyń ishinde bal, sút ónimderi, qus eti, sıyr eti, qoı eti jáne tereń óńdelgen ónimder bar. Agrarlyq saladaǵy yqpaldastyqty nyǵaıtý elderimizdiń azyq-túlik qaýipsizdigi men turaqty damýyn qamtamasyz etýdegi mańyzdy faktor bolatynyna senimdimin», – dedi mınıstr.
Kelissózder barysynda jylqy etin eksporttaý máselesine erekshe kóńil bólindi. Qazirgi tańda eki el arasynda veterınarııalyq-sanıtarııalyq talaptar men veterınarııalyq sertıfıkat nysany kelisilgen. Sondaı-aq Japonııa eksporttaýshylarynyń tizilimine Qazaqstannyń 47 kompanııasy engizilgen.
«Jabıak V ı K» seriktestigi men japondyq Senko Farm kompanııasy arasynda qol qoıylǵan yntymaqtastyq týraly memorandým aıasynda Japonııaǵa aı saıyn 100 bas jylqyny tirideı jáne et ónimderi túrinde eksporttaý josparlanyp otyr. Qazirgi ýaqytta tiri jylqylar men ózge de et ónimderin eksporttaýǵa qoıylatyn talaptardy kelisý jumystary júrgizilýde.
Mınıstr japon naryǵyna Reseıdiń teńiz porttary arqyly logıstıkalyq baǵyttardy paıdalana otyryp, qazaqstandyq joǵary sapaly astyq pen un jetkizýdiń múmkindigi joǵary ekenin de atap ótti.
Taraptar sondaı-aq Prezıdent Qasym-Jomart Toqaevtyń Tokıoda ótken «Ortalyq Azııa – Japonııa» sammıtinde kótergen bastamalaryn júzege asyrý máselelerin talqylady.
Atap aıtqanda, Qazaqstannyń Aýyl sharýashylyǵy mınıstrligi Japonııa Elshiligimen birlesip, Qazaq ulttyq agrarlyq zertteý ýnıversıteti janyndaǵy qazaqstan-japon ınnovasııalyq ortalyǵy bazasynda Turaqty aýyl sharýashylyǵy jónindegi zertteý platformasyn qurýdy pysyqtaýǵa kiristi.
О́z kezeginde Koıke Iýrıko Japonııa tarapynyń Qazaqstanmen agrarlyq saladaǵy áriptestikti nyǵaıtýǵa, ózara saýdany keńeıtýge jáne tehnologııalyq yntymaqtastyqty damytýǵa qyzyǵýshylyq tanytyp otyrǵanyn jetkizdi.
«Japonııa Qazaqstannyń akvamádenıet salasyn damytý tájirıbesin muqııat zerdeleýde. Biz birlesken jobalardy júzege asyrý, tehnologııalar men ǵylymı ázirlemeler almasý mańyzdy ekenin kórip otyrmyz. Osy baǵyttaǵy áriptestik elderimiz arasyndaǵy ózara is-qımyldy jańa sapaly deńgeıge kóteretinine senimdimin», – dedi Tokıo gýbernatory.
Aıdarbek Saparov delegasııa múshelerine osy salany qoldaý sharalary týraly aqparat berdi. Atap aıtqanda, sýbsıdııalaý, jeńildetilgen nesıeleý, salyqtyq jeńildikter jáne qarjylyq emes qoldaý quraldary bar.
«Júıeli jumystyń arqasynda elimizdegi balyq ósirý sharýashylyqtarynyń sany 2,5 eseden astam ósip, 700-ge jetti. Balyq ósirý kólemi jylyna 9 myń tonnadan 26 myń tonnaǵa deıin artty, sondaı-aq salaǵa tartylatyn jeke ınvestısııalar kólemi edáýir ulǵaıdy. Biz bekire ósirý jáne balyq ónimderin tereń óńdeý salalaryndaǵy tájirıbelermen, tehnologııalarmen bólisýge daıynbyz», – dep atap ótti mınıstr.
Kezdesý sońynda Aıdarbek Saparov Qazaqstan Úkimeti ınvestorlar úshin barynsha qolaıly jaǵdaı jasaýǵa daıyn ekenin jáne agrarlyq saladaǵy birlesken jobalar eki memleket arasyndaǵy ekonomıkalyq baılanystar men azyq-túlik qaýipsizdigin nyǵaıtýǵa yqpal etetinine senim bildirdi.
