Belsenip shyǵyp, birliktiń berekesin keltirip, jaqsy isterge uıytqy bolyp júrgen jany jaısań jandardy kórgende qaı kókirekte bolsyn úmit otynyń mazdaı laýlaıtyny bar. Qaı zamanda bolsyn, el bolǵan soń kómekke zárý adamdardyń da kezdeseri aqıqat. Al eń súıinishtisi atymtaı jomarttar odan da kóp eken. Jalpaq álemdi titirentken jaman tumaýdyń zulmat habary el shetine jetkende aýdanda eriktiler toby shoqtaı ekshelip, aldaryna asqaraly mindet qoıyp, birigip, birlese túsken. Osy bir ádemi áreket keıbir keýdedegi muzdaǵan júrekti jibitti, qoldan sýsyp shyǵyp bara jatqan tirshiliktiń túıinderin bekemdedi.
Osydan bir jarym jyl buryn qurylǵan, el ishindegi eriktilerdi toptastyrǵan «Qaıyrymdy ister» klýbynyń jetekshisi Nýrsaıt Mashanlo edi. Jerlesteriniń aıtýyna qaraǵanda, Nýrsaıt boıyndaǵy bar kúsh-qýatyn, erik-jigerin osy bir iske jumsaǵan. Uıymdastyrý qabiletiniń moldyǵyna oraı, janyndaǵy jurtqa izgilik sharapatyn tóge alatyn adamdardy shoqtaı ekshep alǵan. Jaqsylyq jaıylmaı, úlgi bolmaı, ónegesi óristemeı tura ala ma? Eriktilerdiń elge tıgizip jatqan kómeginen qulaqtanǵan, kózderimen kórgen jerlesteri de qol qýsyryp qarap tura almaı, ortaq iske belsene jumylǵan. Osylaısha, shaǵyn ǵana aýdanda qamqorlyq jasaýdan lázzat alatyn, muqtaj jandardy demep, tileý bola alǵanyn tirshiliginiń máni dep sanaıtyn 200-ge jýyq adam klýb músheleri qataryna endi.
Eriktiler aýdanda birneshe márte aksııa ótkizdi. «Ardagerlerdi ardaqtaıyq», «Qoldan qolǵa», «Igi is» tárizdi bastamalar aıasynda muqtaj jandarǵa dári-dármekter jetkizilip, dertten qalaı qorǵaný kerektigi túsindirildi. Qaıyrymdylyqtan qarııalar ǵana emes, balalar da qur alaqan qalǵan joq. Aýdandaǵy bilim oshaqtary oqýshylarynyń osy bir qıyn kezde laıyqty bilim alýyna qolǵabystaryn tıgizdi. Bıylǵy qys boıy jalǵyzilikti jandardyń tizimi jasalyp, qatal qystan qysylmaı shyǵýlaryna septikterin tıgizdi. Ýaqtyly otyn-shópterin úıip, qoradaǵy malyna qaraılasyp, aýlalaryn tazalap berýdi óz mindetterine aldy. Naýryz merekesinde belsendi top músheleri jergilikti atqarýshy organ ókilderimen birlese otyryp, aýdan jurtshylyǵyn quttyqtap, aq túıeniń qarny jarylǵan kúni tamasha tartý jasady. Dámi til úıiretin palaý basyp, baýyrsaq pisirip, halyqqa aýyz tıgizdi.
– Eń bastysy, el ishiniń yntymaǵy, – deıdi klýb jetekshisi Nýrsaıt Mashanlo, – eger biz azyq-túlik sebetterin jetkizip, qolymyzdan kelgeninshe qajetti buıymdaryn taýyp berip jatsaq, el kúnin kóre almaı otyr degen sóz emes. Qazir aýdan turǵyndary baqýatty, biz tek osy bir az ǵana kómegimiz arqyly birligimizdi, yntymaǵymyzdy bekemdeı túskimiz keledi.
Eriktilerdiń eseli isin kórgen jerlesteri de olardyń yqylas-nıetine dán razy. Jaryq dúnıede janyńdaǵy izgi adamnyń jan shýaǵyn sezinip júrgenge jeter ne bar?!
Aqmola oblysy,
Shortandy aýdany
