Kezdesý barysynda eki el yntymaqtastyǵyn odan ári nyǵaıtý, onyń ishinde parlamentaralyq baılanysty arttyrý máseleleri sóz boldy. Senat Spıkeri Qazaqstan elde qolaıly ınvestısııalyq ahýal qalyptastyrýǵa basa mán berip otyrǵanyn atap ótti.
«Bizdiń elimiz sheteldik ınvestorlardy tartý jáne olardyń quqyqtaryn qorǵaý boıynsha júrgizilip kele jatqan belsendi jumysty ári qaraı jalǵastyrýda. Memleket basshysynyń tapsyrmasymen osy baǵyttaǵy tıisti zańdarǵa qajetti túzetýler engizildi. Soǵan sáıkes, endi ınvestısııanyń kólemi men merzimine jáne jumys ornyna baılanysty ınvestorlar korporatıvti tabys salyǵynan, jer salyǵynan, qosymsha qun salyǵynan jáne múlik salyǵynan 10 jylǵa deıin bosatylady. Mundaı qadam el ekonomıkasyna sheteldik, onyń ishinde japon ınvestorlaryn da tartý jáne qazirgideı kúrdeli ýaqytta jańa jobalardy iske asyrý úshin qajet», – dedi Máýlen Áshimbaev.
Sondaı-aq, Senat Spıkeri Qazaqstan men Japonııa arasyndaǵy mádenı-gýmanıtarlyq baılanystardyń qarqyndy damyp kele jatqanyna nazar aýdardy. Oǵan T.Rysqulov atyndaǵy Qazaq ekonomıkalyq ýnıversıteti men M.Nárikbaev atyndaǵy Qazaq memlekettik zań ýnıversıtetinde japon tilin oqytatyn ortalyqtardyń jumys isteýi dálel. Odan bólek, Máýlen Áshimbaev pandemııa kezeńinde elimizge kómek qolyn sozǵan Japonııa Úkimetine alǵysyn bildirdi.
«Qazaqstandaǵy medısınalyq mekemelerge japon medısınalyq qondyrǵylaryn alý úshin arnaıy grant bólgen Japonııa Úkimetine alǵysymyzdy bildiremiz. Bul kómekti qazirgideı kúrdeli kezeńde dostyq pen ózara tıimdi jáne senimdi seriktestiktiń jarqyn kórinisi dep qabyldaımyz», – dedi Senat tóraǵasy.
Sonymen qatar Palata Spıkeri Qazaqstan Senaty ekijaqty yntymaqtastyqty jáne Qazaqstan men Japonııa arasyndaǵy parlamentaralyq qarym-qatynasty odan ári nyǵaıtý úshin tıisti jumysty jalǵastyra beretinin aıtty.
