Egovpress Telegram-arnasynyń jazýynsha, oqıǵa №51 mektepte bolǵan. Jeti qyz mekteptiń 9-synyp oqýshysyna shabýyl jasap, aýyr jaraqat salǵan. Qatygez shabýyldan keıin jasóspirim eki kún jansaqtaý bóliminde jatqan.
Jambyl oblysynyń polısııa departamenti janjalǵa qatysqan barlyq adamdardyń anyqtalyp, polısııaǵa jetkizilgenin habarlady. Oqıǵa boıynsha qylmystyq is qozǵaldy.
«Mektep oqýshylarynyń ata-analary kámeletke tolmaǵan balalardy tárbıeleý mindetterin oryndamaǵany úshin jaýapkershilikke tartyldy. Sondaı-aq jasóspirimderdiń áreketi kámeletke tolmaǵandar isi jónindegi komıssııa otyrysynda qaralyp, nátıjesinde olar profılaktıkalyq esepke qoıyldy», dep habarlady vedomstvo.
Aıta keteıik, buǵan deıin Atyraýda 19 jastaǵy qyzǵa shabýyl jasady degen kúdikpen 21 jastaǵy jergilikti turǵyn ustalǵanyn habarlaǵan edik.
