Qazaqstan úshin Chehııa Shyǵys jáne Ortalyq Eýropa naryqtaryna shyǵýǵa múmkindik beretin mańyzdy hab retinde qarastyrylady. Máselen, QazTrade-tiń baǵalaýyna sáıkes, Chehııa Respýblıkasyna shıkizattyq emes eksportty 654,8 mln dollarǵa deıin arttyrýǵa bolady. Aıtalyq, elimiz aýyl sharýashylyǵy salasy boıynsha 28,4 mln dollar kóleminde jáne ónerkásipke qatysty 626,4 mln dollar shamasynda ónim eksporttaýǵa qaýqarly. Shıkizattyq emes ónimdi syrtqy naryqtarǵa satýdy ulǵaıtý baǵytynda Saýda jáne ıntegrasııa mınıstrligi eksporttaýshylarǵa yntalandyrý tetikterin qarastyrǵanyn aıta ketken oryndy.
Bul rette QazTrade ónimderi Qytaı men EAEO elderinde suranysqa ıe eksporttaýshylar pýlyn ázirlegen. Eksporttyq akselerasııa baǵdarlamasyn iske asyrý arqyly tamaq ónerkásibimen aınalysatyn 35 kompanııa Eýropa naryǵyna maı, tuz, bal, makaron jáne un ónimderin jetkizýge daıyn. Atap aıtqanda, bal óndirisin jolǵa qoıǵan «Lepsınsk ónimi» JShS ónimderi EO standarttaryna sáıkes sertıfıkattaýdan ótkizildi. Buǵan qosa joǵary sapa standarttaryna saı daıyndalatyn jylqy men túıe malynyń qurǵaq sút ónimderi joǵary suranysta.
Elektrondy saýda alańdarynda otandyq ónimniń úlesin arttyrý baǵdarlamasy arqyly búginde Alibaba.com platformasynda 4 myńǵa jýyq otandyq ónim tutynýshylardyń nazaryna usynylǵan.
Qazir Qazaqstan men Chehııa birqatar baǵytta saýda-ekonomıkalyq baılanysty arttyrmaq nıette. Máselen, Jańa ekologııalyq kodeks aıasynda elimiz qaldyqty qaıta óńdeý jáne kádege jaratý salasyn belsendi damytýǵa múddeli. Bul oraıda Chehııa qaldyqty qaıta óńdeýge qatysty tehnologııalardy engizý men ónerkásipte zamanaýı «jasyl» tehnologııalarǵa kóshý tájirıbesimen bólise alady. Sol sekildi chehııalyq bilim berý mekemeleri men avıasııalyq oqý oryndarynda qazaqstandyq ushqyshtardy oqytyp, sertıfıkattaý júrgizilýi múmkin. Ulttyq agenttikter chehııalyq ınvestorlardy mashına jasaý jáne jer qoınaýyn paıdalaný salasyna tartý baǵytynda jumys júrgizip jatyr.
