Áýeli «NPO Zerde» JShS, «Aq nıet» JShS, «Apteka №5», Atamiras.s JShS kóterme qoımalaryn aralaǵan qala ákimi josparlanǵan dárilik zattardy jetkizý jáne jınaqtaý boıynsha rezervtik qorlarmen qamtamasyz etilýine kóz jetkizdi. О́tken jyly koronavırýspen kúreske qoldanylatyn dárilerge bıýdjetten 180 mln teńge bólindi. Bıyl taǵy 659 mln teńge kóleminde turaqtandyrý qoryna qarjy bólinbek. Osy jumystar nátıjesinde dárihanalardaǵy dári baǵasy 15-30 paıyz tómendegen bolatyn.
Búgingi tańda Shymkentte dári-dármek qory jetkilikti. Dárihanalar men emhanalarda 4 mln 144 myń dana dárilik zattar bar. Onyń ishinde ystyq túsiretin, antıbıotıkter, glıýkanattar sekildi vırýsqa qarsy qoldanylatyn dári-dármek túri kezdesedi. Baǵalary 25 teńgeden bastalady. Medısınalyq uıymdarda 900 mln teńgege dári-dármek qory, 46 941 JQQ jıyntyqtary, 2 mln medısınalyq betperde, 1 014 600 medısınalyq qolǵap daıyndaldy.
Kezekti tekserý barysynda M.Áıtenov kúnine 20 myń betperde shyǵaratyn Bizhon JShS-i mekemesine bardy. Mundaǵy betperdeler úsh qabatty, bir ret qoldanylady. 2020 jyly jalpy somasy 78 400 000 teńgeni quraıtyn 2 240 000 dana medısınalyq bir rettik betperde óndirgen.
Al «Ekofarm» JShS mekemesinde kóp rettik jáne bir rettik medısınalyq kıimder tigiledi. О́ndiris orny táýligine 2 myń dana medısınalyq qorǵanys kıimin tigýge qaýqarly. О́tken jyly somasy 4 520 985 404 teńgege 648 876 dana medısınalyq buıymdar shyǵardy. Onyń ishinde obaǵa qarsy kıimder, kóp ret qoldanylatyn dáke tańǵyshtar bar.
Aralaý sońynda qala ákimi «Aıkómek 109» ortalyǵynda qaladaǵy farmkompanııalardyń jáne tıisti sala basshylarynyń qatysýymen onlaın kóshpeli jınalys ótkizdi. Onda farmasevtıkalyq mekeme ókilderiniń máselelerin tyńdap, ortaq sheshimder qabyldandy.
«О́tken jylǵy qatelikti qaıta boldyrmaý úshin dárihanalar men qala turǵyndaryna barynsha túsindirme jumystaryn júrgizý kerek. Vırýsqa qarsy dári-dármekter dáriger nusqaýlyǵymen ǵana satylýy kerek. Pandemııa ýshyqqan sátte turǵyndar arasynda dárilerdi kóptep satyp alyp, úıinde saqtap, merzimi men saqtalý sharttaryn saqtamaǵan, ózin emdeımin dep teris áser alǵan jaılar da boldy. Úı jaǵdaıynda ózin emdeý, alypsatarlyq sekildi máseleler týyndamaýy tıis. Koronavırýspen aýyrǵan naýqastar aýrýhanalarda tegin em qabyldaıdy. Zańsyzdyqtar oryn alar bolsa basshylar qatań jaýapkershilikke tartylady», dedi Murat Dúısenbekuly.
Shahar basshysy densaýlyq saqtaý salasyna jaýapty mamandarmen birge qaladaǵy birqatar aýrýhanany aralady. «Asar» shaǵyn aýdanynda ornalasqan qalalyq klınıkalyq balalar aýrýhanasyna barǵan tekserý toby ondaǵy em-dom jumysymen tanysty. Atalǵan medısınalyq mekeme epıdemııalyq jaǵdaı ýshyqsa, 18 jasqa deıingi balalardy qabyldaýǵa daıyn. Bul úshin aýrýhanada 60 tósektik orynǵa daıyndalǵan juqpaly aýrýlar bólimshesi ashyldy. Infeksııaǵa shaldyqqan balalardy emdeý úshin aýrýhanada medısına mamandary jetkilikti. Sondaı-aq emdeý mekemesi zamanaýı tehnıkalyq qurylǵylarmen jabdyqtalǵan.
Juqpaly aýrýǵa shaldyqqan balalardy aýrýhanada qabyldaý úshin arnaıy jospar daıyndalǵan. Mundaı naýqas balalar bólek bokstarda qabyldanyp, emdeý sharalary tıisti tártippen júrgiziledi. Aıta keterligi, «Asar» shaǵyn aýdanyndaǵy balalar aýrýhanasynda byltyr kópbeı̆indi provızorlyq ortalyq ashylǵan bolatyn. Munda ınfeksııaǵa shaldyqqan 100-den asa bala dertinen saýyǵyp shyqty.
Sondaı-aq qala ákimi «Nursat» shaǵyn aýdanyndaǵy perınataldyq ortalyqty aralady. Munda koronavırýske shaldyqqan júkti áıelder qabyldanady. Bul úshin ortalyqta 30 orynǵa laıyqtalǵan provızorlyq bólimshe ashyldy. Aýrý órshigen jaǵdaıda mundaǵy dárigerler ınfeksııaǵa shaldyqqan júkti áıelderdi qabyldap, medısınalyq kómek kórsetetin bolady. Ortalyqtaǵy provızorlyq bólimshe 100 paıyz ottegi núktesi men IVL apparattarymen jabdyqtalǵan. Koronavırýske shaldyqqan júkti áıelderdi emdeý úshin ortalyqtaǵy 200-den asa medısına mamany arnaıy oqytýdan ótip, biliktiligin arttyrdy. Ortalyqtaǵy qabyldaý bóliminiń mamandary epıdemııaǵa baılanysty naýqastardy taza jáne las aımaqtar boıynsha qabyldap, arnaıy tártippen medısınalyq kómek kórsetedi.
Qala ákimi ótken jyldaǵy qatelikterdi boldyrmaý úshin barynsha daıyndyqty kúsheıte túsý kerektigi jóninde sala basshysyna tapsyrma berdi.
«Medısına salasy – qatelikti keshirmeıtin, adam ómirimen tikeleı baılanysty sala. Sondyqtan aýrýhanalar men emhanalardaǵy árbir jaǵdaı qatań baqylaýǵa alynsyn», dedi qala ákimi.
Jergilikti bılik dárihanalardaǵy baǵa turaqtylyǵyn baqylaýǵa shahar turǵyndaryn da shaqyrdy. Eger alypsatarlyqtyń nemese dári-dármekti shekti baǵadan asyrǵan jaıttyń kýágeri bolǵan jaǵdaıda dereý «109» baılanys nómirine habarlasýǵa úndedi.
ShYMKENT
