Pandemııanyń paıdaly tusy – halyqtyń sıfrly saýattylyǵynyń artqanynda jatyr. Áıtpese qoldarynda qajetti gadjeti men telefony bolsa da kópshilik ózine qajetti qyzmetti burynnan úırengen Halyqqa qyzmet kórsetý ortalyǵyna baryp alǵandy táýir kóretin. Koronavırýs bastalyp, jurtshylyq úıden uzaı almaı qalǵanda amalsyz onlaın qyzmet alýǵa kóshe bastady. Azamattarǵa arnalǵan úkimet te qarap qalmaı, qyzmetkerlerin qaıta daıarlaýdan ótkize bastady.
Korporasııanyń basqarma tóraǵasy Ádil Qojyqovtyń aıtýynsha, jurtshylyqqa keńes berip, kómek kórsetý úshin 2 myńǵa jýyq operator qaıta daıarlaýdan ótip, 250 maman portalda vırtýaldy keńesshi qyzmetin atqarǵan. Sol kezde mamandar 13,9 mln aýdıoqońyraý jáne 8,8 mln beıneqońyraý qabyldap, turǵyndarǵa qyzmetterdi onlaın alý jóninde qoldaý kórsetken eken.
Halyqtyń sıfrly saýattylyǵyn kóterýge baǵyttalǵan is-sharalardyń nátıjesinde byltyr Mobıldi azamattar bazasyna – 9,5 mln, EGOV Mobile qosymshasyna 1,1 mln adam tirkelipti. HQO-daǵy ózine-ózi qyzmet kórsetý sektorlarynda 16 mln azamat onlaın qyzmetter boıynsha keńes alyp, portaldy qoldanýǵa mashyqtanǵan. Sıfrlyq ortalyqtardaǵy arnaıy ashylǵan kýrstarda 800 myńnan astam adam dáris alǵan.
«Áleýmettik jáne zeınetaqymen qamsyzdandyrý salasynda tólemderdiń 44 sanaty boıynsha 15 memlekettik qyzmet usynatyn áleýmettik bloktyń da júktemesi sol kezde eselene tústi. Bul baǵytta byltyr 1,6 mln qyzmet kórsetilse, «1411» baılanys ortalyǵy arqyly 1,2 mln aqparattyq turǵyda keńes berilgen. Korporasııanyń deregi boıynsha karantın kezinde taǵaıyndalǵan 42 500 teńgege baılanysty 12,3 mln tólem, zeınetaqy men járdemaqylarǵa qatysty 6,2 mln tólem qaıta eseptelgen. Sondaı-aq proaktıvti túrde – 162 myń, kompozıtti – 115 myń, «Elektrondyq úkimet» portaly arqyly 224 myń tólem taǵaıyndalǵan. Jalpy, bul saladaǵy qarjy aǵyny 5 787,3 mlrd teńgeni qurapty.
Indet kezinde onlaın kórsetiletin qyzmettiń sany da artqanyn baıqaýǵa bolady. Mysaly, jer qatynastaryna baılanysty qyzmet túrleri onlaın rejimge aýystyrylǵan, memlekettik qyzmet kórsetý úrdisine Blockchain tehnologııasy engizilgen jáne biryńǵaı memlekettik jyljymaıtyn múlik kadastry qanatqaqty jobasy aıasynda jer ýchaskesi alǵash ret onlaın satyla bastaǵan. Sonymen qatar kóliktiń tehnıkalyq pasporty men memlekettik tirkeý nómiri belgisin úıge jetkizý, jeke menedjer qyzmetin paıdalaný, QR-kod arqyly tólem jasaý servısteri de júzege asqanyn atap ótken jón. Byltyrǵy qorytyndy boıynsha Azamattarǵa arnalǵan úkimet barlyǵy 41,7 mln qyzmet kórsetken. Sonyń ishinde jyljymaıtyn múlik salasy boıynsha − 2,5 mln, áleýmettik qamsyzdandyrý salasynda – 1,6 mln, jer kadastry boıynsha – 379 myń qyzmet. Karantın jylynda azamattardan kelip túsken aýdıo-beıneqońyraýlardyń sany 23,9 mln bolsa, sonyń 1,2 mln-y «1411» baılanys ortalyǵyna kelip túsken.
Jalpy, sıfrlandyrý – ozyq tehnologııany paıdalana otyryp ozý, halyqqa kórsetiletin memlekettik qyzmetterdegi ákimshilik kedergilerdi azaıtý. Kezinde halyq bir japyraq qaǵaz alý úshin birneshe mekemeniń tabaldyryǵyn tozdyratyn. Al qazir bul saladaǵy kemshilik edáýir túzelip keledi. Eldiń de artyq júrisi azaıdy. Máselen, «Azamattarǵa arnalǵan úkimet» memlekettik korporasııasy tórt mekemeniń – «Halyqqa qyzmet kórsetý ortalyǵy», «Zeınetaqy tóleý jónindegi memlekettik ortalyq», «Jyljymaıtyn múlik ortalyǵy» men «Jer kadastry ǵylymı-óndiristik ortalyǵynyń» negizinde quryldy. Demek tórt mekemeniń jumysy bir korporasııaǵa toptasty degen sóz.
Korporasııa qurylǵan bes jyldyń ishinde biraz memlekettik qyzmet elektrondy formatqa kóshti. Aıtalyq, memlekettik qyzmetterdi kórsetý tıimdiligin arttyrý maqsatynda birqatar jobalar, sonyń ishinde jyljymaıtyn múlikti tehnıkalyq tekserý rásimderin jeńildetý, jer ýchaskeleriniń kadastrlyq qunyn aıqyndaý men kólikke tehnıkalyq pasport alý ýaqytyn qysqartý, bala týýǵa baılanysty tórt birdeı qyzmetti perzenthanada rásimdeý sııaqty jobalar engizildi. Sondaı-aq «Azamattarǵa arnalǵan úkimet» memlekettik korporasııasynda elimizdiń ósimdikter álemin zertteıtin Biryńǵaı gerbarıı qory quryldy.
Sıfrlandyrýdyń el damýynda paıdasy kóp. Sondyqtan azamattardyń ózderi de burynǵy bolmystan arylyp, memlekettik qyzmetterdi onlaın alýǵa daǵdylanýy kerek. Memlekettik qyzmetterdi elektrondy formatqa kóshirý baǵytynda Azamatqa arnalǵan úkimettiń de óz jospary bar.
«Kún tártibinde turǵan máseleler kóp. Atap aıtqanda, birqatar áleýmettik qyzmetti ońtaılandyryp, ondaǵy qyzmetti avtomatty júıege aýystyrý, HQO-daǵy servıs sapasyn kóterip, qyzmet kórsetýdiń jańa formatyn engizý, jurtshylyqtyń aryz-shaǵymyna der kezinde kóńil aýdaryp, dereý sheshim qabyldaý syndy máselelerdi sheshýdi qarastyryp otyrmyz», deıdi Á.Qojyqov. Ol sondaı-aq saraptama jasaı alatyn Support-qyzmetin iske qosý, mamandandyrylǵan HQO-lardy transformasııalaý, básekege qabiletti kadrlyq rezervti jasaqtaý tárizdi jumystar da kóp uzamaı iske qosylatynyn jetkizdi.
