Galereıa – «Astana» Halyqaralyq ýnıversıtetiniń arnaıy jobasy. Atalǵan ýnıversıtettiń Joǵary óner jáne dızaın mektebiniń dekany Saıat Baımuratuly bizge kórme ortalyǵyn tanystyra júrip, ulttyq mektep qalyptastyrýdaǵy aǵa býyn sýretshilerimizdiń óristi ónegesi jaıynda áńgimelep berdi. Onyń aıtýynsha, kórme ashýdaǵy maqsat – rýhanı jáne ulttyq biregeılikti nyǵaıtý, tarıhı muralardy saqtaý jáne jahandyq mádenı keńistiktiń ózgerý jaǵdaıynda ulttyq beıneleý ónerin damytý. Kórmege táýelsizdik kezeńi aldynda ózindik izdenisimen ýaqyt jarshysyna aınalǵan sýretshiler Oral Tańsyqbaev, Salıhıtdın Aıtbaev, Alpysbaı Qazyǵulov, Kamıl Mýllashev, Ábdiráshıt Sydyhanov, Gúlmıra Telǵozıeva, Zeınekúl Túsipov, Abram Cherkasskıı, Abram Sharaıdenovtiń jumystary qoıylǵan.
«Bizdiń qorymyzda Qazaqstan beıneleý óneriniń ataqty sýretshileriniń jumystary saqtaýly. Arasynda Ulttyq mýzeıde joq qundy jádigerler de bar. Kórip turǵanyńyzdaı, Kamıl Mýllashevtiń Qazan qalasyna qoıylýy tıis «Súıinbıke» músininiń shaǵyn kóshirmesi de osynda tur. Jalpy, «Astana» Halyqaralyq ýnıversıtetiniń quramynda jeti joǵary mektep bar. Sonyń biri osy óner jáne dızaın joǵary mektebi shyǵarmashyl, órshil talapkerlerge jan-jaqty qoldaý kórsetip keledi», deıdi Saıat Baımuratuly. Onyń aıtýynsha, Qazaqstan beıneleý ónerin qoldaý jáne nasıhattaý, otandyq sheberler men talantty jastardy qazirgi álemniń shyǵarmashylyq óner prosesterine tartý – galereıa jumysynyń negizgi mindetteri. Sondaı-aq «Astana» Halyqaralyq ýnıversıtetiniń (AIU) brend-ambassadory NOMAD etnotobynyń ártisteri Oljas Qurmanbek pen Aıqyn Seıtekovtiń Dimash Qudaibergen Team jobasynyń solısteri ekenin de ýnıversıtet maqtanysh tutatynyn atap ótti.
Biz galereıada ótip jatqan mýzeı kórmesin aralaı júrip, dúnıejúzilik óner tarıhynda mańyzdy úles retinde qaralatyn Shyǵys kilemderiniń ekspozısııasyna kýá boldyq. Mundaǵy túrli keskindemelik beınesimen erekshelenetin kilemder ár kezeńdegi óndiris naryǵynan habar beredi. Bul – joǵary mektep bastamasymen qurylǵan úlken kórme kesheni sanalatyn Shyǵys mýzeıiniń kezekti jobasy. «Shyǵys mýzeıiniń taǵy bir jobasy – kilemder. Ár kezeńge tıesili qazaq, túrikmen, ázerbaıjan kilemderi jınaqtalyp jatyr. Baıqasańyz, Eýropa, AQSh elderinde Shyǵys mýzeıi degen arnaıy murajaı bar. Al ondaı shyǵystyq mádenıetten habar beretin mýzeı ózimizdiń Ortalyq Azııada joq. Keleshekte ulttyq dúnıelerdi qalypqa keltirýdi, ekspedısııa uıymdastyra otyryp mýzeı qoryn keńeıtýdi oılastyryp otyrmyz», deıdi Saıat Baımuratuly.
Bıyl Shyǵys mýzeıi men ÚRKER art-galereıasy qory boıynsha arnaıy jınaq shyǵarylmaq. Sondaı-aq mýzeıde nýmızmatıkanyń úlken qory, Shyǵystyń tarıhı kartalary, shyǵys óneri jaıynda syr shertetin sırek basylymdar saqtalǵan. Mýzeı kolleksııasynyń biraz bóligin sheberler syıǵa tartqan 100-den astam jádigerler quraıdy. Tamyryn tereńnen alatyn zergerlik óner sheberleri Shalqar Sekenov, Berik Álibaı, Nurdambek Bekbolattyń toptamasyn da osy qatardan kóre alasyz.
Atalǵan mekteptiń taǵy bir taǵylymdy jobasy – balalar kórkemsýret stýdııasy. Parlament Senatynyń Tóraǵasy Máýlen Áshimbaev, Premer-Mınıstrdiń orynbasary Eraly Toǵjanov bas bolyp ashylǵan ortalyq balalardy kórkemdik-estetıkalyq damýǵa jeteleı otyryp, tájirıbeli ustazdar aldynan sándik-qoldanbaly óner, keskindeme, grafıka jáne músin óneri jaıynda dáris alýǵa múmkindik beredi.
«Astana» Halyqaralyq ýnıversıtetinde «Dızaın» baǵdarlamasy boıynsha oqytylatyn tanymal sáýlet jáne ınterer dızaıny, grafıkalyq dızaın, veb-dızaın mamandyqtary naryqtyq ekonomıkadaǵy kóptegen baǵytty qamtıdy. Bul mamandyq boıynsha oqýdyń basty artyqshylyǵy Kamıl Mýllashev, Jumaqyn Qaırambaev, Qazbek Ájibek sheberhanasynan tálim alýǵa múmkindik beredi.
Qaı zamanda da óner úlken qamqorlyqty qajet etkendigin eskersek, búgingi ýaqyt sheńberinde ýnıversıtet bergen múmkindik negizinde kórgeni men túıgeni mol, tájirıbesi tolyqqan aǵa býyn ǵıbratyn keleshek jastarǵa jetkizýdiń mańyzy zor.
