Qazir qalada jumysyn toqtatqan janarmaı beketteriniń sany kóbeıgen. Benzındi iri stansalar ǵana satyp jatyr. Satýshylar azaıǵan soń, baǵa da qymbattaǵan. AI-92 markaly benzınniń lıtri 160-175 teńge aralyǵynda. Al oblystyń shalǵaı aýdandarynda lıtri 200 teńgege bir-aq jetken.
«Benzınnniń qymbattaǵany eshteme emes, keıbir zapravkalarda joq, «talonmen» dep solaı jazyp qoıypty. Endi qazir kóktem ýaqyty, aýyl sharýashylyǵy jumystary bar, dachalar bar. Qazir naǵyz benzın kerek kez. Onyń joq bolyp jatqany, qymbattatyp jatqany birinshiden halyqtyń qaltasyna aýyr túsedi», deıdi Oral qalasynyń turǵyny Manarbek Kýshalıev.
«Bir apta buryn qaladaǵy maı quıý beketteriniń birinde baǵanyń ósýi muń edi, qalǵandary da soǵan ilesti. Tipti benzın azaıyp, tapshy bola bastady. Jalpy, bizdiń ekonomıkamyz qyzyq. Munaı qymbattasa, benzın de qymbattaıdy. Biraq munaı arzandasa, benzın sol qymbat baǵamen satyla beredi», deıdi taǵy bir turǵyn.
О́ńirge qajetti janarmaı osyǵan deıin kórshiles Atyraý men Reseıden jetkiziletin. Kórshi oblystaǵy zaýyt jóndeý jumystaryna jabylǵasyn, benzınniń azaıǵanyn jergilikti sheneýnikter de moıyndaıdy.
«Energetıka mınıstrliginiń habarlaýy boıynsha, Atyraýdaǵy zaýyt 24-sáýirde jumystaryn bitiredi eken. Qazirgi ýaqytta Shymkent zaýytynan ákelinýde. Bul endi ózinara baǵanyń qymbatsýyna ákelinip otyr. Qalada jabylǵan janarmaı beketteri bar, aýylda da jabylyp jatqandar bar», deıdi BQO TÚKSh basqarmasy basshysynyń orynbasary Beıimbet Mýsın.
Sala ókilderi Atyraýdaǵy munaı óńdeý zaýyty iske qosylǵasyn, jaǵdaı retteler degen úmitte. Biraq benzın tasymaly qaıtadan jolǵa qoıylǵansha da biraz ýaqyt qajet. Ári baǵanyń qalaı qubylaryn eshqaısysy tap basyp aıta alar emes.
