Ozyq ǵylymı tehnologııalardy transfertteý maqsatynda Memleket basshysy Q.Toqaevtyń «Jańa jaǵdaıdaǵy Qazaqstan: is-qımyl kezeńi» atty Qazaqstan halqyna Joldaýynda 500 ǵalymnyń álemdegi jetekshi zertteý ortalyqtarynda jyl saıyn taǵylymdamadan ótýin qamtamasyz etýdi tapsyrǵany belgili.
Jıyndy ashqan Memlekettik hatshy búginde túrli sala mamandaryna ózderiniń kásibı bilimderin jańartýǵa múmkindik beretin qysqa merzimdi oqytýdyń nemese taǵylymdamanyń mańyzdylyǵy artyp kele jatqanyn atap ótti. Buǵan «Bolashaq» baǵdarlamasy boıynsha úmitkerler arasyndaǵy úlken konkýrs dálel. Osyǵan baılanysty halyqaralyq baǵdarlama sheńberinde ǵalymdar úshin taǵylymdamalardyń arnaıy sanaty bekitildi.
Otyrys barysynda Komıssııa mynadaı sanattar boıynsha taǵylymdamalardy bekitti: ǵalymdar, densaýlyq saqtaý salasyndaǵy qyzmetkerler, pedagogtar, memlekettik qyzmetshiler, ınjenerlik-tehnıkalyq qyzmetkerler.
Bilim jáne ǵylym mınıstri Ashat Aımaǵambetovtiń aıtýynsha, taǵylymdama sanattarynyń tizimin qalyptastyrý kezinde memlekettik organdar men múddeli uıymdardan kelip túsken ótinimder negizinde naryqtyń naqty qajettiligine taldaý júrgizilgen. Jalǵasyp jatqan pandemııa jaǵdaıyndaǵy jańa syn-qaterlerdi eskere otyryp, ǵylymı, medısınalyq jáne ınjenerlik-tehnıkalyq qyzmetkerlerdiń taǵylymdamalaryna basymdyq beriledi.
Otyrys qorytyndysy boıynsha Memlekettik hatshy Qyrymbek Kósherbaev «Bolashaq» halyqaralyq stıpendııasyn iske asyrýdyń tetikterin odan ári jetildirý jáne onyń tıimdiligin arttyrý jóninde birqatar tapsyrma berdi.
