Vladımır Volkovtyń tóraǵalyǵymen ótken keńeıtilgen otyrysta talqylanǵan qujattardyń biri – «Qazaqstan Respýblıkasy men Soltústik Makedonııa Respýblıkasynyń arasyndaǵy qylmystyq ister boıynsha ózara quqyqtyq kómek týraly shartty ratıfıkasııalaý týraly» zań jobasy. О́z sózinde senator Rysqalı Ábdikerov zań jobasynda quqyqtyq kómek kórsetýdiń sharttary men tártibi jáne odan bas tartýdyń negizi belgilengenin atap ótti.
Sonymen qatar depýtattar «Qazaqstan Respýblıkasy men Soltústik Makedonııa Respýblıkasy arasyndaǵy sottalǵan adamdardy berý týraly shartty ratıfıkasııalaý týraly» zań jobasyn qarady. Senat depýtaty Sultanbek Mákejanov osy qujatqa sáıkes, sottalǵan adamdy berý ol eki elde de qylmys bolyp esepteletin is-áreketi úshin sottalǵan jaǵdaıda júrgiziletinine nazar aýdardy. Bul rette sottalǵan adamǵa qatysty shyǵarylǵan sot sheshimi sońǵy bolýy jáne aldaǵy jazasyn óteý merzimi alty aıdan kem bolmaýy kerek ekenin atap ótken jón. Odan bólek, berýge eki tarap ta jáne sottalǵan adamnyń ózi de kelisýi tıis.
Otyrys kezinde senatorlar «Qazaqstan Respýblıkasy men Soltústik Makedonııa Respýblıkasy arasyndaǵy adamdardy ustap berý týraly shartty ratıfıkasııalaý týraly» zań jobasyn da qarady. Senator Nurlan Beknazarovtyń aıtýynsha, bul qujat taraptarǵa qylmystyq jaýapkershilikke tartý nemese sot úkimin oryndaý úshin eki eldiń quzyretti organdary izdeý salǵan adamdardy ustap berýge jaǵdaı jasaıdy.
Komıtet tóraǵasy V.Volkov keńeıtilgen otyrysty qorytyndylaı kele, Qazaqstan táýelsizdik alǵaly 30-ǵa jýyq memleketpen ekijaqty negizde osyndaı shart jasasqanyn jáne elimiz birqatar kópjaqty kelisimniń qatysýshysy ekenin aıtty. Sondaı-aq ol mundaı tájirıbeniń mańyzdylyǵy men qajettiligi jyl saıyn nyǵaıyp kele jatqan ekonomıkalyq, mádenı, sharýashylyq, iskerlik jáne basqa da memleketaralyq qarym-qatynastarǵa baılanysty ekenin sóz etti.
