Senator naqtylap ótkendeı, jer memlekettiń menshiginde bolýy agrarlyq salanyń damýyna kedergi keltirmeıdi. Qazir sharýashylyqtar aýylsharýashylyǵy jerlerin 49 jylǵa deıin jalǵa alyp otyr. Eger jer paıdalanýshy tıimdi jumys isteıtin bolsa, sol jerdi kelesi merzimge jalǵa alýǵa múmkindigi bar. Iаǵnı bul shart kóptegen sharýashylyqtarǵa tıimdi deýge bolady. «Osy sózdiń dáláli retinde aıtarym, 2003 jyldan 2016 jylǵa deıin aýylsharýashylyǵy maqsatynda jerlerdi menshikke berýge rýqsat etilgen 13 jylda sol jerlerdiń tek 1,3 % satyp alynǵan. Iаǵnı aýylsharýashylyǵy jerleriniń 99 % jalda qalyp otyr. Atap ótkim keletini, eger jerdi jalǵa berý mehanızmy agrarlyq óndiriske tıimdi bolmasa, qazir fermerlerdiń kóbisi jerdi satý kerek dep talap qoıatyn edi. Meniń oıymsha, bizdiń komıssııamyz burynnan sheshimin tappaı kele jatqan óte mańyzdy máseleni sheshti. Aýyl sharýashylyǵy jerlerin úshinshi tulǵalarǵa memleketten satyp alýsyz jaldaý quqyǵyn ıelikten shyǵarý. Bul jerdi memlekettiń menshiginde qaldyra otyryp, naryqtyq aınalymǵa qosýǵa, bankterge ony jalǵa alý quqyǵyn kepildikke qoıýǵa múmkindik beredi. Ekinshi másele, agrarlyq salaǵa ınvestısııa tartý týraly. Men birinshi otyrysta aıtqanmyn, sheteldik ınvestısııa tartý úshin eń negizgi shart - aýylsharýashylyq óndirisiniń turaqty jáne joǵary rentabeldi bolýy. Ol úshin bizdiń agrarlyq salamyzdyń memlekettik qoldaý júıesi damyǵan elderdegi sııaqty tıimdi bolýy kerek», deıdi Aqylbek Kúrishbaev.
Senator naqtylap ótkendeı, aýylsharýashylyǵy jerlerin satýdan túsken ınvestısııaǵa keletin bolsaq, joǵaryda aıtqan 13 jylda Ulttyq ekonomıka mınıstrliginiń Ekonomıkalyq zertteý ınstıtýtynyń málimeti boıynsha, sol jerlerdi satýdan qazynaǵa 40 mıllıard teńgege jýyq qarajat túsipti. Bul qoǵamdy sonshalyqty dúrliktiretin qarjy emes ekenin qaperge salyp ótken senator basqa elderdiń tájirıbesine nazar aýdardy. Alys-jaqyn shetelderde jerdi kezinde satyp alǵan tulǵalar, menshiktegi jerinde ózderi jumys istemeı tek jalǵa berip otyr. «Bul aýylsharýashylyǵy ónimderiniń ózindik baǵasyn kóteredi, aýyldyq aımaqtarda áleýmettik máselelerdi, jumyssyzdyqty týdyrady. Mundaı memleketterde jer qatynastarynda rante paıda bolady. Biz osyndaı máselelerdiń aldyn alý kerekpiz. Eger bolashaǵymyzdy oılaıtyn bolsaq, bizdiń urpaǵymyzǵa aýyl sharýashylyǵy maqsatyndaǵy jerlerdi paıdalaný qoljetimdi bolýy óte mańyzdy. Iаǵnı olar óziniń agrarlyq bıznesin ashý úshin, jerdi jer ıelenýshilerden nemese latıfýndısterden satyp almaı, tikeleı memleketten alý múmkindigine ıe bolýy qajet. Aýyl sharýashylyǵy jerleriniń menshigi týraly suraq qazir búkil qoǵamymyzdy tolǵandyryp otyr. Memleket basshysy bizge osy máseleni ashyq túrde jáne muqııat qaraýdy tapsyrdy. Sondyqtan biz búgin halqymyzdyń oıynan shyǵatyn sheshim qabyldaýymyz kerek!», dep sózin túıindedi Aqylbek Kúrishbaev.
