О́zbekstan astanasy Tashkentte jalaýyn kótergen básekege Qazaqstannan 17 sportshy qatysyp, baqty men baptaryn synady.
17-25 sáýir aralyǵynda ótken sary qurlyqtaǵy bul jarys Tokıo Olımpıadasy aldyndaǵy irikteý týrnırlerdiń qataryna jatady.
Aızada Múptildá jarysqa saıystyń sońǵy kúni shyqty. 87 keliden joǵary salmaq dárejesinde óner kórsetken otandasymyz alǵashqyda 118 keli ziltemirdi kóterip, joǵary nátıje kórsetti. Sondaı-aq ol serpe kóterý saıysynda da myqtylyǵyn dáleldedi.
Osylaısha Aızada Múptildá jarys jolynda 269 keli kórsetkishpen Azııa birinshiliginiń qola medalin jeńip aldy.
Kúmis medaldy ońtústikkoreıalyq sportshy ıelense, altyn medal qytaılyq aýyr atletke buıyrdy.
Jalpy Azııa chempıonatynyń qorytyndysy boıynsha, qazaqstandyq ziltemirshiler 7 medal ıelendi. Onyń bireýi altyn, úsheýi kúmis, taǵy úsheýi qola júlde. Jarys jolynda otandastarymyz el namysyn 13 salmaq dárejesinde qorǵady.
– Qarsylastarym óte myqty boldy. Barlyǵy jaqsy daıyndalǵan. Úshinshi oryn úshin aıqastyń ózi tartysty boldy. Tehnıka jaǵynan azdaǵan qatelikter jiberdim. Alla jazsa, ony jóndeımiz degen nıet bar, – deıdi Aızada Múptildá.
Aıta keteıik, Aızada Múptildá Qyzdar ýnıversıtetiniń Pedagogıka jáne psıhologııa joǵary mektebinde «Dene shynyqtyrý jáne sport» mamandyǵynda 3 kýrsta bilim alady.
Sportshy buǵan deıin de aýyr atletıkadan el chempıonattary men álemdik jarystarda júldeger atanyp, oqý ornynyń mereıin asyrǵan bolatyn.
