Bıyl avtomobıl joldarynyń qurylys-jóndeý jumystarymen 400-ge jýyq nysan jáne 1250 shaqyrym joldar men eldi meken kósheleri qamtylady. 780 shaqyrymnan astam joldy bıyl paıdalanýǵa berý josparlanýda. Jyl qorytyndysymen oblystyq jáne aýdandyq mańyzy bar avtomobıl joldarynyń jaqsy jáne qanaǵatty jaǵdaıdaǵy úlesin 79%-dan 81,4%-ǵa deıin arttyrý kózdelýde. Májiliste oblys ákimi jol sapasyn arttyrýǵa qatysty birqatar tapsyrmalar berdi. Jyl saıyn joldardy jóndeýge jumsalatyn qarjynyń turaqty bólinýin jáne kútip ustaýǵa jetkilikti qarjy qaraýdy tapsyrdy. Sondaı-aq jóndeýden ótken joldardy merziminen buryn buzylýyn boldyrmaý úshin aýyr salmaqty júk kólikteriniń qozǵalysyn retteý júkteldi. Oblys úshin mańyzdy Shymkent, Túrkistan, Saryaǵash aınalma joldarynyń qurylysyn bastaý boıynsha Indýstrııa jáne ınfraqurylymdyq damý mınıstrligimen tıisti jumystar júrgizý qajettigi aıtyldy.
Aıta ketelik, Túrkistan oblysyndaǵy joldardyń jalpy uzyndyǵy 18 myń shaqyrymdy quraıdy. О́tken jyly atqarylǵan jumystardyń nátıjesinde oblystyq jáne aýdandyq mańyzy bar avtomobıl joldarynyń jaqsy jáne qanaǵattanarlyq jaǵdaıdaǵy úlesi 74,1%-dan 79%-ǵa jetti. Qurylys-montajdaý jumystaryn atqarý kezinde kemshilikterge jol bergeni úshin merdiger, tehnıkalyq jáne avtorlyq qadaǵalaýshy mekemelerge aıyppuldar salyndy. Eskertýler berilip, 58 myń sharshy metrden astam asfalt jamylǵysy, 6,2 shaqyrym jol negizi buzylyp, qaıta salyndy. «Sapaly jol-Adaldyq alańy» jobasy aıasynda anyqtalǵan barlyq aqaýlar qalpyna keltirildi.
