«28 sáýir kúni Raıymbek aýdandyq aýrýhanasyna túsken polısııa qyzmetkeriniń jaǵdaıy ortasha aýyr. Qazir ol hırýrgııalyq bólimde em qabyldap jatyr. Oń jaq aıaǵynyń artqy jaǵynan jaraqat alǵan, ota jasaldy, basqa da em-sharalar jasalýda», dedi Almaty oblystyq densaýlyq saqtaý basqarmasy baspasóz qyzmetiniń ókili Láılim Áýbákirova.
Esterińizge sala keteıik, 27 sáýir kúni tún ortasynda Raıymbek aýdanynyń ishki ister organdarynyń eki qyzmetkeri arasynda janjal týyndap, sońy atyspen aıaqtalǵan.
«Saldarynan olardyń biri tabeldik qarý qoldanǵan. Ýchaskelik ınspektor jambasynan oq jaraqatyn alyp, Narynqol aýylynyń aýrýhanasyna jatqyzyldy. Bolǵan jaǵdaıdy tekserý úshin oqıǵa ornyna bardyq. Barlyq mán-jaıdy baqylaýymyzǵa alamyz», dep jazdy Almaty oblysy polısııa departamentiniń bastyǵy Serik Kúdebaev Facebook paraqshasynda.
Qazir atalǵan oqıǵaǵa oraı QK-niń 24-baby, 3-bóligi jáne 99-baby 1-bóligi «Adam óltirýge oqtalý» boıynsha sotqa deıingi tergeý bastaldy.
