Prezıdent «Qazaqstannyń 100 jańa esimi» jobasynyń jeńimpazdarymen kezdesýge qatysty

Qasym-Jomart Toqaev «Qazaqstannyń 100 jańa esimi» jobasynyń jeńimpazdaryn quttyqtap, olardyń óz darynymen kópshilikti moıyndata bilgenin, memleketimizdi órkendetýge aıyryqsha úles qosyp kele jatqanyn aıtty. Olar bizdiń halqymyzdyń maqtanyshtary, ózge elder Qazaqstandy osy azamattar arqyly tanyp, baǵalaıdy.

– Qazaqtyń qandaı halyq ekenin jer júzine tanytyp júrgen birneshe azamat osy jobanyń jeńimpazy atandy. Biz túrli salada jetistikke jetken osyndaı otandastarymyzdyń eńbegin dáripteýimiz kerek. О́ıtkeni tabysty jandardyń tájirıbesi árdaıym basqalarǵa úlgi-ónege. О́skeleń urpaq ózderińizge qarap boı túzeıdi, uqsaýǵa tyrysady. Men elimizdiń árbir perzenti sizder sııaqty ónegeli bolsyn dep tileımin, – dedi Prezıdent.

Memleket basshysy tereń bilimin ozyq tájirıbemen ushtastyra bilgen azamattardyń elimizdi alǵa jeteleıtinine senimdi. Prezıdent Táýelsizdik kezeńinde ósip jetilgen býynnyń qarym-qabiletin joǵary baǵalady.

– Bilimdi ári sanaly urpaq tárbıeleý – bul asa mańyzdy memlekettik mindet. Elimizdiń bolashaǵy daryndy, otanshyl jastardyń qolynda bolýy kerek. Solaı bolaryna kámil senemin. Osy strategııalyq maqsatqa qol jetkizý úshin  júıeli reformalardy mindetti túrde jalǵastyramyz, – dedi Memleket basshysy.

Prezıdent qoǵamdaǵy birlik pen kelisimniń, barsha qazaqstandyqtardyń jasampaz eńbeginiń arqasynda damýda aıtarlyqtaı alǵa ilgerilegenimizdi atap ótti.

– Bul jerde bizdiń jetistikterimizdi kórsetetin kóptegen sandar men derekterdi mysalǵa keltirýge bolady. Biraq barlyq tabys adamdardyń berekeli ómirimen, jetken jetistigimen jáne kemel keleshekke umtylysymen ólshenetinin este ustaýymyz kerek. Sizder elimizdiń baılyǵy ekenderińiz sózsiz. О́sip-órkendegen, ádiletti, damyǵan Qazaqstandy qurý sizderge júkteledi. Sondyqtan adam kapıtalyn jan-jaqty damytý bizdiń memleketimizdiń basty basymdyǵy bolǵan jáne solaı bola bermek, – dedi Qasym-Jomart Toqaev.

Osy ýaqytqa deıin «Qazaqstannyń 100 jańa esimi» jobasyna 7,5 myń adam qatysyp, elimiz talaı talantty, talapty qazaqstandyqtardyń atyn tanydy.

– Osy jobanyń arqasynda óziniń erekshe emdeý tásilimen kóptegen adamǵa perzent súıý baqytyn syılaǵan dáriger-reprodýktolog Aıdos Ibragımovty búkil elimiz tanydy. Jobanyń 2019 jylǵy qatysýshysy Imanbek Zeıkenov jaqynda ǵana «Grammy» syılyǵyn jeńip alyp, onyń aty búkil álemge jaıyldy. Onyń jetistigi tek Qazaqstan úshin ǵana emes, TMD úshin de teńdesiz. Jobanyń tórtinshi maýsym jeńimpazdarynyń jetistikteri de eshkimdi beı-jaı qaldyrmaıdy, – dedi Memleket basshysy.

Jobanyń árbir qatysýshysyna qarata aıtqan sózinde Qasym-Jomart Toqaev olardyń jetistigi Qazaqstan tabysynyń kórinisi ekenin, olar ózderiniń patrıottyq áreketi arqyly barsha qazaqstandyqtardy yntalandyratynyn atap ótti. 

– Sizderdiń jetistikterińiz kez-kelgen statıstıkadan artyq. Osynaý keremet joba sizderdi odan ári damýǵa erekshe talpyndyryp, qoǵam men el ıgiligi úshin jańa ıdeıalardy iske asyrýdyń keń kókjıekterin ashty dep senemin. Elimiz óziniń daryndy jastarynyń kóptigimen maqtana alady jáne maqtanýǵa tıis. Qazaqstannyń bolashaǵy sizderdeı progressıvti, talantty, patrıot jastardyń qolynda. Sizder memlekettiń basqarý tizginin qolǵa alýǵa daıyn bolýlaryńyz kerek. Al biz, ıaǵnı aǵa tolqyn, osy aıtqan sózimizdiń shyndyqqa aınalýy úshin barlyǵyn jasaımyz, – dedi Prezıdent.

Memleket shyǵarmashylyqqa, bilim men ǵylymǵa, jastardy qoldaýǵa basa nazar aýdaryp otyr. Osy jolda tıimdi áleýmettik lıft qalyptastyrýdyń orny bólek. «Bolashaq» halyqaralyq stıpendııasy, Prezıdenttik jastar kadrlyq rezervi óskeleń urpaqtyń el damýyna óz úlesin qosýyna mol múmkindik berip otyr.

– Bizdiń ultymyzdyń boıynda kreatıvti ındýstrııany damytýdyń asa zor múmkindigi bar. Dál qazir kreatıvti ekonomıka mıllıardtaǵan dollar ınvestısııa tartýdyń, turaqty ekonomıkalyq ósýdiń, áleýmettik órkendeýdiń birden-bir joly. Qazaqstan mádenıetiniń ókilderi óńirlik jáne jahandyq deńgeıde óz oryndaryn oıyp turyp alyp jatyr. Biz osy múmkindikti elimizdiń mádenıetin álemge tanytýdyń joly retinde qarastyrýymyz kerek. Sondyqtan men Úkimetke osy strategııalyq mańyzdy salany qoldaý úshin keshendi sharalar qabyldaýdy tapsyrdym, – dedi Qasym-Jomart Toqaev.

Memleket basshysynyń pikirinshe, kreatıvti ındýstrııany damytýdyń tıimdi bir tásili retinde zamanaýı qazaqstandyq aıdentıkany qalyptastyrý qajet.

Prezıdent joba qatysýshylarynyń ıdeıasy men usynystaryn iske asyrý úshin olardy ortalyq memlekettik organ basshylarymen júıeli túrde kezdestirip turý qajet dep sanaıdy.

– «Júz jańa esim» jobasy qazaqstandyq armannyń anyq iske asqanyn kórsetedi. Árbir talantty, eńbekqor, maqsatshyl adam osy zamannyń batyry jáne ult maqtanyshy bola alady. Sizder sııaqty tabysty azamattar neǵurlym kóp bolsa, elimizdiń básekege qabileti soǵurlym arta túsedi.  Halqymyzdyń mereıi de ústem bolady.  «Júz jańa esim» jobasynyń maqsaty da – osy. Qazirgi zaman – bilim men ǵylymnyń dáýiri.  Sanasy sergek, oıy ushqyr jastardy el úshin aıanbaı eńbek etýge shaqyramyn. Bul sizderdiń qoldaryńyzdan keledi. Men Qazaq eliniń jastaryna senemin! – dedi Memleket basshysy.

Onlaın formatta ótken «Qazaqstannyń 100 jańa esimi» jobasy jeńimpazdarynyń kezdesýinde erikti-stýdent Daryn Ábiljanov, ǵalym, adamdar men janýarlarǵa vaksına ázirleýshi Qaısar Tabynov, IT-maman, robot tehnıkasy mektebiniń negizin qalaýshy Damır Núrkejanov, hımııa pániniń jas oqytýshysy Ulan Úsenov, syzý pániniń muǵalimi, óz aýylynda kópir salý bastamasyn kótergen Ahat Raqyshev, ınjener-ónertapqysh Sanjar Taıjan, AQSh-tyń hokkeı klýbyna bas bapker bolǵan tuńǵysh qazaqstandyq qyz Bulbul Qartanbaı, ekolog Ekaterına Vıbe, sondaı-aq, aqyn, álem ádebıetin qazaq tiline aýdaryp júrgen Serikjan Qajytaı sóz sóıledi.