Týrnır Qazaqstan Táýelsizdiginiń 30 jyldyǵy aıasynda uıymdastyryldy. Oblys ortalyǵyndaǵy «Muz aıdyny» sport kesheninde 29 sáýir - 1 mamyr aralyǵynda ótken jarys bıyl besinshi ret jalaýyn kóterdi. Respýblıkalyq týrnırge Nur-Sultan, Almaty, Shymkent qalalary jáne birqatar oblystardan 10 komanda qatysty. Dúbirli saıysta 5-18 jas aralyǵyndaǵy sportshylar qysqa jəne erkin baǵdarlamalarda óner kórsetti.
Jarys karantın talaptaryn saqtaı otyryp, kórermendersiz ótkizildi. «Meniń atymda mundaı jarystyń bolýy - ózim úshin úlken maqtanysh. Týrnır joǵary deńgeıde ótti. Qatysýshylardyń daıyndyǵy da, oıyn kórsetýi de unady. Eń bastysy, osyndaı týrnırler arqyly sportshylar ózin shyńdap, elimizdiń atyn álemge áıgili etse eken deımin. Jalpy, osy dodanyń ótýine qoldaý kórsetken ári men úshin jankúıer bolyp júretin jerlesterime aıtar alǵysym sheksiz», dedi mánerlep syrǵanaýshy Elızabet Tursynbaeva.
Qazirgi tańda Qyzylorda oblysynda 60-qa jýyq bala mánerlep syrǵanaýmen aınalyssa, bul týrnırge óńirden onǵa jýyq sportshy qatysty. «Aımaqta mánerlep syrǵanaý sporty damyp keledi. Al oǵan Elızabet sekildi el maqtanyshy súbeli úles qosary anyq. Men kásipker retinde mundaı týrnırlerdi qoldaýǵa daıynmyn. Sebebi aldaǵy ýaqytta Syr jastary arasynan elimizdiń namysyn halyqaralyq arenalarda qorǵaıtyn daryndy sportshylar ósedi dep senemin», dedi oblystyq konkı sporty federasııasynyń prezıdenti Maǵjan Erálıev.
