Kóńildi elitken Qazaqstan jáne Reseı Sýretshiler odaǵynyń múshesi, UNESCO, «Shabyt» halyqaralyq festıvaliniń laýreaty, H.Dosmuhamedov atyndaǵy Atyraý memlekettik ýnıversıteti «Beıneleý jáne dızaın» fakýltetiniń dosenti Kamıla Japalovanyń «О́mir órnek» atty kórmesi. Táýelsizdigimizdiń 30 jyldyǵyna arnalǵan is-shara oqyrmandy eleń etkizdi. Ulttyq mýzeıde toptasqan qalyń qarashanyń qylqalam sheberine degen qoshemeti bólek boldy. Jahandyq indettiń saldarynan kópten beri mundaı ǵajap týyndylardy kórmegen halyqtyń ónerge degen saǵynyshyn sol keshte sezdik.
Atalǵan kórmeniń alǵashqy sózin Ulttyq mýzeı dırektorynyń orynbasary Abaı Satybaldın aldy.
«Ulttyq naqyshta beınelengen batık ónerinde erekshe qoltańbasy bar Kamıla Japalovanyń sulýlyq álemi, qudiretti qylqalam arqyly dúnıe júzin tańǵaldyrǵan eńbekteri mýzeı qonaqtarynyń júreginen de erekshe oryn alatynyna nyq senimdimin», dedi A.Satybaldın.
Izgi tilekten keıin óner ıesine arnaıy Alǵys hat pen tósbelgi tabystaldy. Sonymen birge elordadaǵy Sýretshiler odaǵynyń tóraǵasy О́miráli Ismaılov ta áserimen bólisti.
Osynaý erekshe qolóneri arqyly qazaqtyń ulttyq mádenıetin, salt-dástúrin nasıhattap kele jatqan Kamıla Ábenqyzynyń qaıtalanbas týyndylary sonyń aıǵaǵy», dedi О́.Ismaılov. Odan ári rýhanı keshke arnaıy kelgen memleket jáne qoǵam qaıratkerleri aq tilekti jalǵap, sýretshiniń shyǵarmashylyǵyn joǵary baǵalady.
Kamıla Japalova kartınalarynyń ózindik sıpaty men erekshe stıli bar. Kartınalardyń sıýjetteri ártúrli, kóbine folklorlyq naqyshta jáne lırıkalyq abstraksııada qurylǵan. Biraq barlyǵyn biriktiretin elementter – ulttyq reńk pen kompozısııanyń ishki yrǵaǵy.
Avtor batık tehnıkasyn qoldana otyryp erekshe óner týyndylaryn dúnıege ákelgen. Kenep betinde de batık dástúrin qoldanady. Shynynda ol batık tehnıkasynda 20 jyldan astam jumys istep keledi eken. Qansha ýaqyt ótse de budan shyǵarmashylyq lázzat alatynyn jasyrmaıdy.
Sýretshiniń týyndylarynan ystyq batıktiń «krakle» sııaqty dástúrli tásilderin qoldanatyny, tústerdi minsiz ári dál tańdaı biletini baıqalady. Tabandylyq pen qajyrly eńbeginiń, izdenisiniń arqasynda búginde kóptegen marapat pen ataqqa ıe bolǵan.
Aıta keteıik, sýretshiniń qorjynynda ulttyq kıim úlgileri de bar. Kórmege sýretshiniń keskindeme jáne batık úlgisindegi 100-den astam týyndysy usynyldy ári avtorlyq ulttyq kıimderdiń sán úlgisi de kórsetildi.
Jasampaz óner ıesiniń shyǵarmashylyǵyn órkendetý arqyly jalpy sýretshilerdiń mártebesin kóterýdi kózdegen uıymdastyrýshylardyń sózine súıensek, aldaǵy ýaqytta ataýly kórmedegi batık óneriniń erekshe týyndylaryn elorda turǵyndary men qonaqtary bir aı boıy tamashalaı alady.
