«Qazgıdromet» RMM agrometeorologııalyq monıtorıng jáne boljaý departamentiniń dırektory Nonna Loenkonyń aıtýynsha, kóktemgi egý jumystarynyń aldynda birqatar óńirde ónimdik ylǵal qory jetkilikti bolady dep kútilýde.
«Atap aıtqanda, Aqmola oblysynyń Astrahan, Atbasar, Egindikól, Zerendi, Selınograd aýdandarynda, Qostanaı oblysynyń Beıimbet Maılın, Sarykól, Qostanaı aýdandarynda, Soltústik Qazaqstan oblysynyń Shal aqyn aýdany men Jumabaev, Tımırıazev, Jambyl aýdandarynyń keı jerlerinde, Qaraǵandy oblysynyń Buqar jyraý, Nura aýdandarynyń keıbir tustarynda, Shyǵys Qazaqstan oblysynyń Glýbokoe jáne Altaı aýdandarynda topyraqtyń ylǵaldyǵy qanaǵattanarlyq deńgeıde», dedi spıker.
Onyń sózinshe, osy jáne ózge de málimetter bıyl qazanda kásiporyn daıyndap iske qosqan «AgroData» veb-qosymshasyna ornalastyrylǵan.
«Ekologııa mınıstriniń tapsyrmasymen biz fermerlerge arnalǵan veb-qosymshany ázirledik. Qazir onyń mobıldi nusqasyn jasap jatyrmyz. Degenmen qazirdiń ózinde braýzer arqyly uıaly telefonmen qosymshadaǵy aqparatty alýǵa bolady. Bul jerde Qazgdıromettiń tek aýa raıyn boljaýmen aınalyspaıtynyn atap ótýimiz kerek. Munda halyqtyń qaýipsizdigin, onyń ishinde azyq-túlik qaýipsizdigin qamtamasyz etýge baǵyttalǵan ónimderdiń tolyq spektri daıyndalady», dep atap ótti Nonna Loenko.
Departament dırektory «AgroData» júıesindegi aqparattyń kóbi buryn da bolǵanyn, biraq olardyń ártúrli platformalarda ornalasqanyn aıtady. Al jańa qosymsha fermerlerge qajetti barlyq aqparatty bir jerden alýǵa múmkindik týǵyzyp otyr.
«Bul málimetterge qoljetimdilikti jeńildetip, ony tıimdirek qoldanýǵa múmkindik beredi. Qosymshany neǵurlym túsinikti, qoldanýǵa jeńil etip jasaýǵa tyrystyq. Qazgıdromet ázirleı alatyn fermerge qajetti aqparatty belgili bir sharýashylyqqa beıimdelgen esepke júginbeı-aq mobıldi qosymshadan kórýge bolady. Buǵan 3 saǵat jańaryp otyratyn aýa raıy, sınoptıkalyq jáne agrometeorologııalyq boljamdar men naqty derekter kiredi», deıdi Nonna Loenko.
Budan bólek, sýarý maýsymynda memlekettik baqylaý jelileriniń pýnktteri boıynsha belsendi jáne tıimdi temperatýralardyń ólshemi men topyraq ylǵaldylyǵynyń qory, al kún sýyq kezde qardyń bıiktigi, tońnyń tereńdigi boıynsha aqparat beriledi.
«AgroData»-da sonymen qatar buryn bolmaǵan ár on kúndikke arnalǵan naqty málimetter de bar. Osylaısha, alynǵan aqparat boıynsha agrotehnologııalardy ýaqtyly jáne tıimdi qoldaný egin naýqanyn durys josparlaýǵa, ósimdikterdiń solyp qalýynyń aldyn alýǵa múmkindik beredi.
«Ylǵal qory týraly málimet kóktemgi egin naýqanynda tıimdi egis normasyn anyqtaýda, tuqymdy tastaıtyn tereńdikti tańdaýda, tyńaıtqysh qoldanýda úlken ról atqarady. Munyń barlyǵy ónimniń kólemine áserin tıgizedi», deıdi ol.
