«Qaǵaz úıdiń» qupııasy

Fılm jazýshy, prodıýser Aleks Pınniń qylmyskerler toby týraly dramasynyń jelisi boıynsha túsirildi. Ispanııa qarjy saraıyn tonaýǵa she­shim qabyldaǵan Professor atanǵan kóshbasshy maıdan qyl sýyrǵandaı barly­ǵyn oı eleginen ótkize otyryp, tonaýǵa ebi bar, esebi túgel mamandardy óz tobyna jınaı bastaıdy. Syrt kózge kóp, sózge sarań, uıań kórinetin momyn jigit polısııanyń attap basqan qadamyna jospar qura bildi. Sýyq aqyl men sergek sana qashanda onyń basty qarýy bolatyn. Qan tógýdi murat tutpaǵan, tek keregin ǵana alýdy maqsat etken ol maıdan dalasynda ózin bir sátte joǵaltyp alǵan emes. Muny sýǵa salsa batpaıtyn, otqa salsa janbaıtyn áldebir ertegi keıipkerimen shatastyrmaǵan jón. Munda barlyǵy shynaıy. Kó­rer­mendi jipsiz baılap qoıǵan sıý­jettik shıelenister men tosyn sheshimder keıipkerler taǵdyryna eriksiz ılandyrǵan edi.

Áne-mine degenshe jańa maýsymy shyǵyp qalady dep kútip otyrǵan serıal tusakeseri áýelde Ispanııada ótti. 2017 jyly al­ǵash­qy serııasyn 4 mıllıonnan astam adam tamashalady, bi­raq ár serııasy shyqqan saıyn qa­ralym sany tómendeı berdi. Tele­shoý ujymy fılmdi ármen qa­raı túsirý, túsirmeý kerektigin bilmeı ári-sári kúıde otyrǵan-dy. «Meniń áleýmettik jelide azdaǵan oqyrmanym bar edi. Azdaǵan saǵattarda-aq jazylýshylardyń sany kúrt artyp, 8-9 mıllıon oqyrmanǵa jetti. Mundaı ta­ny­maldyqty eshkim kútpegen edi. Bárimiz bir-birimizge qarap «bir­deńe bolyp jatyr» dep tań­ǵaldyq», deıdi serıalǵa túsken akterlerdiń biri Alba Flores. Iá, rasymen de úlken jarylys bolǵan edi. О́ıtkeni Salvador Dalıdyń maskasymen bet-júzin jasyryp, qyzyl kombınezon kıgen qaraqshylar týraly áńgime oılamaǵan jerden Netflix nazaryna iligip qalady. «Sáttilik sátsizdiktiń arǵy betinde» degen osy bolar, osydan soń-aq serıal túsirýshilerdiń baǵy janyp, áp-sátte álemge tanylyp shyǵa kel­gen edi. Arna shoý quqyǵyn al­ǵannan keıin, Casa de Papel atty túp nus­qa ataýyn Money Heist dep ózger­tip, epızodtardyń uzaq­tyǵyn 70 mınýttan 45 mı­nýtqa deıin qys­qartyp, serıal sanyn arttyrdy.

Fılmdegi revolıýsııalyq qoz­ǵalys Ekinshi dúnıejúzilik soǵys kezinde ıtalııalyq par­tı­zandardyń antıfashıstik án­urany bolǵan Bella Ciao ánimen kómkerilgen. 2018 jyldyń ja­zyndaǵy osynaý shoýdyń arqa­synda jeńis áni qaıtadan jer-jerde shyrqalyp jatty. Serıal shyqqannan keıin qyzyl kombınezon men Dalı maskalary kesh­terde ǵana tanymal bolyp qoımaı, urlyqqa túsken ká­dimgi tonaýshylar da kıe bas­tady. Osydan soń qaýipsizdik maq­satynda karnaval kezinde mun­daı kostıýmderdi kııýge tyıym salǵan jaǵdaılar da kezdesti. Ispanııanyń El Mundo gazeti óz ke­zeginde shoýdyń adamdarǵa mundaı áserin «qaraqshylar ıdealdy antıgeroı bolyp kórinetin jahandyq kóńilsizdik kórinisi» dep sıpattasa, túrik baspasózi terrorızmdi qoldaýǵa shaqyratyn sımvoldyq kórinis dep shoýǵa tyıym salýǵa shaqyrdy. Osy­laısha, fılm tarıhtaǵy úzdik serıal­dardyń qataryna enip, kóp­tegen marapatqa ıe boldy. 2018 jyly bedeldi Emmy Awards syılyǵynyń úzdik dramasy ataǵyn aldy. Sol jyly New York Times gazetiniń nusqasy bo­ıyn­sha úzdik telehıkaıalar tizimine endi. Taǵy bir aıta keterligi, fılm­de Qazaqstan ataýy birdi-ekili jerde atalatyn tustary bar. Ke­ıipkerdiń biri «Bizdiń aqshamen Qazaqstannan da spýtnık satyp alýǵa bolady», deıdi. Árıne, munymen ssenarıı avtorlarynyń naqty ne aıtqysy kelgeni beı­málim, dese de oq pen ottyń or­ta­syndaǵy maıdan dalasynan Qazaq­stan atyn estip eleńdep qalǵa­nymyz ras. Al eń bastysy halyq súıispenshiligine alǵaýsyz bólengen serıaldyń jańa maýsymyn jankúıerler armııasy taǵatsyzdana kútip otyr!