«Astanany» qaı klýb toqtatady?

Onynshy týrdaǵy jeti kezdesýdiń beseýinde jeńimpaz komanda anyqtalsa, qalǵan eki matchta komandalardyń kúshteri teń boldy.

Týrdyń ortalyq oıyny Jam­bylda jergilikti «Taraz» ben týr­nır kestesinde jeke-dara kósh bas­tap kele jatqan elordanyń «As­tana» klýbtary arasynda ótti. Jyl basynda aýtsaıderler qa­tarynda bolady dep kútilgen «Taraz» chempıonattyń jeti týrynda tórt márte jeńiske jetip, eki oıynda qarsylastarymen upaı bólisip, júldege úmitti klýbtar qatarynan bir-aq shyqty. О́tken týrda «Tobyldan» jeńilgen soń alań qojaıyndary bul joly «Astanadan» upaı alýǵa tyrysqan bolatyn. Alaıda 10 týrdan beri qarsylas shydatpaı kele jatqan elordalyq ujym «Tarazdy» da tize búktirdi. Oıyndaǵy jalǵyz ári jeńisti goldy matchtyń 34 mınýtynda Abzal Beısebekov soqty. Osy 10 týrda 13 komanda keminde bir márte jeńilistiń ker­mek dámin tatsa, ázirge tek «As­tana» ǵana jeńilistiń ne ekenin bilmeı kele jatyr. Elordalyq klýbty endi qaı komanda toqtata alady eken?

Chempıonatta birinshi bolyp bapker aýystyrǵan «Shahter» jańa jattyqtyrýshymen jaqsy nátıjege qol jetkize bastady. Máselen, osy týrda Almatyǵa sapar shekken «kenshiler» byltyrǵy el chempıony «Qaırattan» upaı aldy. Birinshi taımda ko­man­dalardyń kúshi teń boldy. Al ekinshi taımda alańǵa tyńnan qo­sylǵan shabýylshy Artýr Shý­shenachev 51 mınýtta gol soǵyp, «Qaıratty» esepte alǵa shyǵardy. Tablodaǵy kórsetkish 90 mınýtqa deıin ózgerissiz qalyp, oıyn «Qaırattyń» jeńisimen aıaqtalýǵa jaqyn turǵan edi. Biraq tóreshi tarapynan ekinshi taımǵa qosylǵan tórt mınýttyń sońǵy mınýtynda «Shahterdiń» qaqpashysy Tı­mýrbek Zakırov 90 mınýt boıy shabýylshylar soǵa almaǵan goldy ózi salyp, komandasyn jeńilisten qutqaryp qaldy.

Týrnır kestesinde sońǵy oryndarda kele jatqan «Turan­nan» 1:0 esebimen masqara bolyp jeńilgen «Ordabasy» bul joly áreń degende syrt alańda «Kaspıımen» teń oınady. Eki komandaǵa da jankúıerlerin qýantý úshin jeńiske jetý óte mańyzdy bolatyn. О́ıtkeni «Kas­pıı» de ótken týrda «Atyraýdan» 2:1 nátıjesimen jeńilgen edi. Biraq eki ujym da 90 mınýt boıy bir-biriniń osal tusyn taba almady. Kezdesý 0:0 esebimen teń aıaq­taldy.
Oraldyń «Aqjaıyq» klýbyn qabyldaǵan «Qaısar» Qy­zylordada 1:0 esebimen qarsy­lastaryna jol berdi. Matchtyń she­shýshi golyn 76 mınýtta reseılik shabýylshy Dmıtrıı Mıchýrenkov soqty. Ekinshi match qatarynan úsh upaıǵa qol jetkizgen «Aqjaıyq» 15 upaımen segizinshi orynnan besinshi orynǵa kóterildi. Al tórt oıynda úshinshi márte jeńilgen qyzylordalyq komanda alty upaı­men 13-orynǵa syrǵydy.

Kelesi kúni alǵashqy bolyp jasyl alańǵa «Jetisý» men «Aq­tóbe» shyqty. Bul kezdesý 10-týrdaǵy statıstıkaǵa baı oıyn­­nyń biri boldy dep aı­ta alamyz. Iаǵnı onynshy týrdaǵy eń kóp gol da, eń kóp «sary» jáne «qyzyl» qaǵaz da osy oıynda kór­setildi.

Taldyqorǵandaǵy ala dop básekesinde alty gol soǵylyp, tóreshi eki oıynshyny alańnan qýsa, 9 fýtbolshyǵa «sary» qaǵaz kórsetti. Asa shıelenisti ótken oıynda «Aqtóbe» ózbekstandyq sha­býylshy Igor Sergeevtiń het-trıgi jáne Iýrıı Persýh pen Boıan Dýbaııchtiń soqqan bir-bir goldarynyń arqasynda 5:1 esebimen «Jetisýdyń» tas-tal­qanyn shyǵardy. Bul – «Aqtóbeniń» keıingi bes matchtaǵy alǵashqy jeńisi. Aıtpaqshy, «Aqtóbe» qa­ta­rynan tórt oıynda jeńilgen soń burynǵy bas bapkeri Alekseı Ba­gany otstavkaǵa jibergen bolatyn.

Qostanaıda «Tobyl» men «Aty­raý» sheberlik baıqasty. Bul match­ta eki klýb oıynshylary 80 mınýt boıy bir-biriniń qaqpa kil­tin taba almaı, biraz ábigerge tús­ti. Biraq match aıaqtalǵanǵa deıin «Tobyl Arenaǵa» jınalǵan jan­kúıerler bir emes, eki goldyń kýási boldy. «Tobyl» sapynan ekinshi taımda alańǵa shyqqan Serikjan Mýjıkov 80 mınýtta qostanaılyqtardy esepte alǵa jetelese, qosymsha ýaqytta Jeremı Man­zorro osy maýsymdaǵy al­ǵashqy golyn soǵyp, komandasyna jeńis syılady. Bıylǵy Sý­perkýbok ıeleri mańyzdy úsh upaıǵa qol jetkizip qana qoı­maı, «Atyraýdyń» bes oıynǵa jal­ǵasqan jeńilissiz serııa­syna núkte qoıdy.
Qazaqstan chempıonatyna bıyl ǵana qosylǵan Túrkistan ob­lysynyń «Turan» klýby ekinshi týr qatarynan sensasııa jasap ke­ledi. О́tken týrda júldeli oryndardan úmitti «Ordabasy» komandasyn syrt alańda 1:0 esebimen tize búk­tirse, bul týrda Petropavldyń «Qyzyljar» ujymynan dál sondaı eseppen aılasyn asyryp ketti. Oıyndaǵy jalǵyz ári jeńisti goldy penaltıden Stefan Jıvkovıch soqty.
14 jáne 15 mamyr kúnderi ótetin 11-týrda «Aqtóbe» – «Qaı­sar», «Astana» – «Jetisý», «Shahter» – «Turan», «Aqjaıyq» – «Qaı­rat», «Ordabasy» – «Tobyl», «Qyzyljar» – «Kaspıı» jáne «Atyraý» – «Taraz» komandalary kezdesedi.