Mine, sport salasyndaǵy sondaı jarystardyń qataryna endi grek-rım kúresinen Qazaqstannan shyqqan tuńǵysh Olımpıada chempıony, álem birinshiliginiń jeńimpazy jáne birqatar halyqaralyq jarysta el namysyn abyroımen qorǵaǵan Qazaqstannyń Eńbek Eri Jaqsylyq Úshkempirovti eske alýǵa arnalǵan halyqaralyq týrnır qosyldy.
«О́zimnen keıin kúres túrlerinen qazaqtan shyqqan Olımpıada chempıonyn kórip ketsem, armanym joq edi», dep kózi tirisinde aıtyp, keıinnen bul armanyn sońynan ergen balýandarǵa amanattap ketken dańqty balýan Jaqsylyq Úshkempirov byltyr dúnıeden ótken edi.
Artynda qalǵan urpaǵy, eli Jaqsylyq Úshkempirovtiń esimin árdaıym el jadynda saqtaý úshin bıyldan bastap dańqty Olımpıada chempıonyn eske túsirýge arnalǵan 2001-2003 jyly týǵan jasóspirimder arasyndaǵy halyqaralyq týrnır uıymdastyrdy.
Aıtýly jarys elorda tórinde Jaqsylyq Úshkempirovtiń óz esimi berilgen Jekpe-jek saraıynda ótkizildi. Jarystyń ashylý saltanatyna Mádenıet jáne sport mınıstri Aqtoty Raıymqulova, Nur-Sultan qalasy ákiminiń orynbasary Baqtııar Máken, Birikken kúres álemi bıýrosynyń múshesi, Azııa keńesiniń prezıdenti Dáýlet Turlyhanov jáne general-polkovnık Sát Toqpaqpaev qatysty.
Aqtoty Rahmetollaqyzy sportshylarǵa Qazaqstan Respýblıkasynyń Prezıdenti Qasym-Jomart Toqaevtyń quttyqtaý hatyn jetkizdi. «Qurmetti dostar, barshańyzdy Olımpıada jeńimpazy, Qazaqstannyń Eńbek Eri Jaqsylyq Úshkempirovti eske túsirýge arnalǵan halyqaralyq týrnırdiń ashylýymen quttyqtaımyn. Bul – búkil dúnıe júzi úshin aıtýly oqıǵa. Jaqsylyq Ámiráliuly – qazaqtan shyqqan tuńǵysh Olımpıada chempıony ǵana emes, búkil el yqylasyna bólengen erekshe tulǵa. Ol sanaly ǵumyryn eline qyzmet etýge arnap, týǵan ólkesin órkendetýge ólsheýsiz eńbek sińirdi. Jaqsylyq Úshkempirovtiń ómir joly óskeleń urpaqqa qashanda ónege. Halqymyzdyń birtýar perzentiniń esimin ulyqtap, eńbegin baǵalaý jolynda búgingideı is-sharanyń mańyzy zor. Baıraqty básekege qatysýshylarǵa sáttilik tileımin», delingen quttyqtaý hatta.
Baqtııar Máken qazaqtyń dańqty balýany Jaqsylyq Úshkempirovke elordada eskertkish ashylatynyn aıtyp ótti.
«Búgingi jarysqa, elordamyzǵa kelgen barsha qonaqqa qosh keldińizder deımiz. Jaqsylyq aǵamyz qazir aramyzda bolmasa da esimi árdaıym jadymyzda. Byltyr barsha halyqtyń qoldaýymen Nur-Sultan qalasyndaǵy Jekpe-jek saraıyna elimizdiń birtýar uly Jaqsylyq Úshkempirovtiń esimi berilgen bolatyn. Bıyl atalǵan sport kesheniniń dál aldyna aǵamyzdyń eskertkishin qoıý josparlanyp otyr», dedi qala ákiminiń orynbasary.
Úsh kúnge sozylǵan halyqaralyq jarysta Qazaqstan, Reseı, Grýzııa, Ýkraına, Tájikstan, Qyrǵyzstan jáne О́zbekstannan kelgen 250-den asa jas sportshy 55, 60, 63, 67, 72, 77, 82, 97, 130 kılo salmaqtarda ózara kim myqtyny anyqtady. Jaqsylyq Úshkempirovtiń ózi beldesken grek-rım kúresinde boz kilemge shyqqan balýandardan bes otandasymyz halyqaralyq jarystyń jeńimpazy atandy. Asa jeńil salmaqta (55 kg) óner kórsetken jerlesimiz Erasyl Mamyrbekov top jardy. Otandasymyz fınaldyq saıysta grýzııalyq Dmıtrıı Khachıdzennen aılasyn asyryp ketti.
Sonymen qatar keıingi úsh salmaqtyń fınaly, atap aıtar bolsaq, 60, 67 jáne 77 kılo salmaqtyń altyn júlde úshin saıystary qandastarymyzdyń arasynda ótti. 60 kıloda Nursultan Bazarbekov altyn júldeni ıelense, Aıbek Esmuratov kúmis júldeni qanaǵat tutty. 67 kıloda Din-Muhammed Qoshqar Nursultan Jomartovqa qaraǵanda alymdy boldy. Al 77 kıloda Veısal Eıýbovqa teń keler qarsylas tabylmady. Ol fınalda Nurjan Asandy jeńip ketti. Asa aýyr salmaqta beldesken jerlesimiz fınalda qyrǵyzstandyq Davran Sydykovtan aılasyn asyryp, Qazaqstan quramasynyń qorjynyna besinshi altyn júldeni saldy.
Al 63 jáne 72 kılo salmaqtarda grýzııalyq balýandarǵa teń keler qarsylas tabylmady. 63 kıloda Dıego Chhıkvadze tuǵyrdyń eń bıik satysyna kóterilse, 72 kıloda Georgıı Chhıkvadze altyn medal jeńip aldy. 82 kıloda qyrǵyzstandyq balýan Bekzat Orýnkýlýýlynyń baǵy jansa, 97 kıloda ózbekstandyq balýan Abrorbek Nýrmýhammedov myqtylyq tanytty.
Jalpykomandalyq esepte qazaqstandyq balýandar birinshi oryn ıelendi. Keıingi orynǵa grýzııalyq balýandar jaıǵasty.
