«Folıant» baspasynan jaryq kórgen týyndyny qazaq tiline aýdarǵan – Maqsat Dúıismaǵambet. Jazýshynyń bul týyndysy «Úlken kitap», «Jyl kitaby», «Iаsnaıa Polıana», «Oqyrman júldesi» atty ádebı syılyqtarǵa ıe bolǵany belgili.
Baspa ókilderiniń aıtýynsha, «Zúleıhanyń oıanýy» kitabyn qazaq tiline aýdarýǵa romanda oryn alǵan tarıhı oqıǵalardyń ortaqtyǵy, kóptegen marapattar men syılyqtarǵa ıe bolýymen qatar, qoǵamda ekijaqty pikir qalyptastyrýy sebep bolǵan.
Gúzel Iаhına Qazan qalasynda týyp-ósken, shet tilderi fakýltetin bitirgen. Sondaı-aq Máskeý kıno mektebiniń dıplomyn aldy. «Neva», «Sibir shamdary», «Oktıabr» jýrnaldarynda maqalalary jarııalanǵan.
Reseılik jazýshy Gúzel Iаhınanyń bul romany – ótken tarıhymyzdaǵy áli kúnge deıin aıtylmaı júrgen ashy shyndyqtyń betin ashyp, búgingi jáne keıingi urpaq bilýi tıis aqıqatty aıta bilgen týyndy.
«Zýleıhanyń oıanýy» romanynyń áreketi 1930 jyly tatar aýylynda bastalady. 1930 jyldyń qysynda Zýleıhanyń kúıeýin baı-kýlak retinde óltirip, ózin júzdegen adammen birge vagonmen Sibirge jiberedi. Romannyń ekinshi bóliminde Angaranyń jaǵasyndaǵy tereń taıgada tamaqsyz, baspanasyz jáne jyly kıimsiz jer aýdarylǵandardyń tirshiligi baıandalady. Sibirge jer aýdarylǵan, tar kezeńde taǵdyrlary toǵysqan san alýan jan ólim men ómir bettesken sátterde tiri qalý úshin birlese kúresedi. Rýh qaısarlyǵy. Júrek jylýy. Ana mahabbaty. Romannyń bas keıipkeri Zúleıha osy qasıetteriniń arqasynda taǵdyr synaǵynan súrinbeı ótedi.
«LıtRes» kompanııasy quramyna kiretin «MyBook» kitap servısi Reseı jazýshylarynyń 1992 jyldan bergi ýaqytta jaryq kórgen eń tanymal kórkem týyndylarynyń kóshin Gúzel Iаhınanyń «Zúleıhanyń oıanýy» romany bastap turǵanyn anyqtady.
2017 jyly roman 18 tilge aýdaryldy, bashqurt drama teatrynda qoıyldy. 2020 jyly týyndy 30 tilge aýdarylǵan, onyń ishinde parsy, koreı, qytaı, japon tilderi de bar. 1920 jyldyń sáýir aıynda shyǵarma jelisi boıynsha túsirilgen kóp serııaly fılmniń alǵashqy bólimi kórsetildi. Basty rólde tanymal aktrısa Chýlpan Hamatova oınady. Fılm rejıssıori — Egor Anashkın.
Esterińizge salsaq, «Folıant» baspasynyń bastamasy boıynsha álem ádebıetiniń altyn qazynasyna aınalǵan Haled Hosseınıdiń «Jarqyraǵan myń kún», Mo Iаnnyń «О́mir men ólim azaby», Orhan Pamýktyń «Aq qamal», «Sezim mýzeıi», «Meniń atym Qyrmyzy», «Meniń oǵash oılarym», «Únsiz úı» týyndylary qazaq tilinde jaryq kórgen bolatyn. Naýryz aıynda Shvesııa Koroldiginiń Qazaqstan Respýblıkasyndaǵy Elshiligimen birlese, álemge tanymal shved jazýshysy Astrıd Lındgrenniń tuńǵysh ret qazaq tiline aýdarylǵan «Uzynshulyq Pıppı» kitabynyń tusaýkeseri ótti.
Qazaq oqyrmandaryn álem ádebıetiniń bestseller kitaptarymen tanystyrýdy maqsat etken «Folıant» baspasy bıyl Reı Bredberıdiń «Farengeıt boıynsha 451 gradýs», Djon Ronald Rýel Tolkınniń «Saqınalar ámirshisi», Stıven Kıngtiń «Sol», «Jasyl mıl», «Rıta Heıvort jáne Shoýshenkten qashý», Ken Kızıdiń «Jyndylar úıindegi janjal», Lýıza Meı Olkotttyń «Kishkentaı hanymdar», Sharlotta Bronteniń «Djeın Eır», Djo Dıspenzanyń «Túpsana kúshi», Nıkolaı Lýgınovtiń «Shyńǵys hannyń ámirimen», Den Braýnnyń «Da Vınchı kody», Gerbert Ýellstiń «Kórinbeıtin adam», Ahmet Úmittiń «Ystambul estelikteri», Djon Steınbektiń «Tyshqan men adam haqynda», «Injý-marjan», Klaıv Steıplz Lıýıstiń «Arystan, sıqyrshy jáne kıim shkaf», Roberto Rıchchıdiń «Qyzyl Arlekın» týyndylaryn jaryqqa shyǵarýdy josparlap otyr.
