Eń áıgilisi – soǵys jyldary Modena taýlaryndaǵy qarsylasý qozǵalysy músheleri oryndaıtyn nusqa. Bizge belgilisi ándi sondaǵy partızandardyń biri jazǵan. Áýeni «Uıqy dárisi» atty balalar ánine uqsas keledi. Al jyr mátini ár joly túrlishe oryndalyp júrgenimen, bir-birinen kóp erekshelenbeıdi. Ánniń álemge tanylýyna 1947 jyly Pragada ótken alǵashqy Halyqaralyq jastar men stýdentter festıvali yqpal etkeni daýsyz. Aıbyndy ánniń yrǵaǵy men ekpindi qaıyrmasy tipti ıtalıan tilin túsinbeıtinderdiń ózin baýrap aldy jáne áp-sátte búkil Eýropaǵa taraldy. Ásirese ıtalııalyq ánshi Mılva (1965) men fransııalyq Iv Montana (1970) shyrqaǵan nusqalary halyq kóńilinde aına-qatesiz jattalyp jatty. Al Keńes Odaǵy tyńdarmandaryn alǵash ánmen qaýyshtyrǵan belgili ańyz ánshi Múslim Mogamaev bolatyn. Ol 1972 jyly Bolgarııada qurmetti qonaq bolǵanynda «Altyn Orfeı» estradalyq ánder baıqaýynda turyp, «Men Italııada bizdiń partızan dostarymyz tartý etken ándi oryndaǵym keledi. Italııada taǵylymdamadan ótip júrgenimde erekshe dostasyp kettik. Bul án Italııada aıtylǵan kezde, zalda otyrǵan ıtalııalyqtar «Bella, chao, chao, chao...» dep jan-tánimen qosyla shyrqaıdy. Bizge de shý shyǵarýǵa bolady», degen ánshi uıańdaý kelgen keńestik tyńdarmandardy jigerlendire túsetin. Ánshiniń estelikterinde («Jıvýt vo mne vospomınanııa») aıtylǵandaı KSRO-nyń bolashaq bas hatshysy Leonıd Brejnev te erekshe súıip tyńdaǵan desedi.
«... Berlınde shaǵyn konsert daıyndalyp jatqan bolatyn. Keıbir ártister arnaıy Máskeýden kelipti, bizdiń toptan bireýlerdi erte kelipti... Men sol kezde naqty ne aıtqanym esimde joq, biraq bir ándi mindetti túrde oryndaýym kerek edi, bul – partızandar áni «Bella Ciao» bolatyn. Bul án Brejnevke óte unady. Ol alǵash ret ony Kremldiń Sezder saraıynda KSRO Joǵarǵy Keńesiniń depýtattyǵyna kandıdat retinde usynylýyna oraı uıymdastyrylǵan konsertte de estidi. Men án aıttym, al búkil aýdıtorııa maǵan qoshemet kórsetip, shapalaq ura bastady. Arasynda Leonıd Ilıchtiń ózi qosyldy. Sodan keıin bul oǵan ádetke aınaldy», dep jazdy ánshi.
Al ánniń sazyna qatysty da san-saqqa júgirgen boljam tolastaǵan emes, keıde ózge halyq shyǵarmalarynyń mýzykasyna da uqsastyrady. Synshylar sonymen qatar Dus Zekele Koilen («Kómirdiń kishkentaı qaby») dep atalatyn ánmen aıqyn uqsastyǵyn atap kórsetedi. Bul ándi ataqty syǵan akkordeonısi Mashka Zıganoff 1919 jyly kúzde Nıý-Iorkte jazǵan edi.
Kez kelgen án sol dáýirdiń, oqıǵanyń, qozǵalystyń sımvolyna aınalǵanyn bylaı qoıǵanda, túrli janrdaǵy mýzykalyq tájirıbelerdiń negizgi nysanasy. Bella Ciao áni de japon djaz ınterpretasııalarynda keń qoldanys taýyp, nebir rok-grýppalardyń qaıyrmasyna aınaldy. Postmodernızm dáýirinde birneshe ret jańa túsinik berilgen osynaý kórkem shyǵarma azattyqtyń ánurany ári álemdik manıfest, ári revolıýsııa urany bolyp shyrqaldy emes pe. Bella, chao! Qalaı bolǵanda da, ásirese hormen qosyla shyrqaǵanda keýdeńizdegi júrek qaǵysyn tezdetip, qarsylyǵyn kúsheıte bastaıtyny anyq. Qarapaıym áýenniń ishine kómilgen bir qupııasy bary anyq. Bálkim, osynaý syrshyl ánniń áseri sonaý kúnderdegi týǵan tabıǵatynan bastaý alatyn bolar?!
