Erteńinen úmit kútetin ejelgi qazaqtyń ádetinshe jazǵyturym ornap, jaqsylyqtyń jupar ıisin jutýǵa beıimbiz. Betperde bórtegúl ıisin sezdirmedi. Osyndaıda jaılaýǵa tarta jónelse ǵoı deısiń. Tózimimizdi tozdyrǵan táýliktiń erejesine baǵynbaı, samal aýamen erkin tynystaıtyn.
Beıneleý ónerine qatysty termınderdi tizip jazýǵa bolar edi, biraq biz ózimizdiń kóńil tarazymyzben ólshegendi jón kórdik. Endigi áńgime qazaqtyń baǵyna bergen dańqty sýretshi Ábilhan Qasteevtiń «Jaılaý» kartınasy týraly. Qulanıektenip tań atyp kele jatqanda qozy-laqty enesinen bólip, kókke aıdaýǵa shyǵatyn keshegi jastyqtyń jasyl boıaýy. Jelmen jarysqan, ıtpen alysqan qoıshy balalarynyń tumsa tabıǵat tósinde asyr salǵan mereıli mezetteri. Avtordyń balalyq shaǵyna sálem-saýqatyndaı jasampaz beıne. Qara da, ózińdi kór. Kartınada sizdiń de baldáýren kúnderińizdiń jańǵyryǵy bar.
Jastyq shaǵy ótken asqar taýlar, kókpen tildesken zeńgir quz-jartastar, bıik betkeılerdegi arsha men qaraǵaıdyń kilemdegi órnekteı tizilgen sulýlyǵy bolashaq sýretshi júreginiń qylyn shertkendeı. О́zenniń bergi jaǵasyndaǵy sazdaqqa jaıylǵan mal taýly óńirdiń sánin keltirip tur. «Jaılaý kórki – mal» degen qazaq maqaly osyndaıda aıtylsa kerek. Jol boıynda ketip bara jatqan adamdar beınesi alystan emis-emis baıqalady. Basyn qar basqan zeńgir taýlar tákappar ór minezimen sustana qaraıdy. Taý etegindegi tereń saılar salalanyp erekshe kórinedi. Sarǵysh qońyrqaı tóbe qandaı ásem edi. Bul kóriniske tamsanyp ta, tańǵalyp ta qaraı beresiń...
Tákappar taýlardyń ushar basyna shyǵyp, bala kúndegideı Muqaǵalıdiń óleńin oqysa, shirkin! Mańdaıyńdy samal jeldiń alaqany sıpap, keýdeńe qanat bitkendeı, kúıbeń tirlikten bir sátke ada kúı kesherińiz shúbásiz.
Men – taýlyqpyn!
Taýdan men jaratylǵam.
Taý degen – Ana týǵan, dara tulǵam!
...Taýǵa baryp
Kókke ushyp ketsem be eken,
Ustap alyp qyrannyń qanatynan.
Adamǵa qanat bitiretin armany desek, eń alǵash arman túzgen topyraqqa nege taǵzym etpeske? Muratymdy áldılegen osy jaılaý edi. Mynaý ǵajap kartına sony qaıta eske túsirdi. Jazǵa sálem joldaıyq!
