Jasynan Arqanyń kerbez dalasyn áýezdi ánge bólegen Birjan sal, Aqan serini ustaz tutqan ol solardyń izin jalǵap, ózi de sózi men sazy úılesken ánder shyǵardy. Balýan Sholaqtyń búginge jetken «Ashyly-aıyryq», «Balýan Sholaq», «Jeldirme», «Dikildek», «Kókshetaý», «Qosalqa», «Qos baraban», «Qos perne», «Qulan kisines», «Kenje qońyr» sekildi birtalaı áni bar. Onyń halyq arasyna keńinen taraǵan áni – «Ǵalııa». Bul týyndy − móldir mahabbat pen názik sezimdi terbetken syrshyl dúnıe.
Belgili óner zertteýshisi Aleksandr Zataevıch el arasynan Balýan Sholaqtyń birneshe ánin jazyp alyp, ony «Qazaq halqynyń 1000 áni» jáne «Qazaqtyń 500 áni men kúıi» jınaqtaryna engizgen.
Osydan eki jyl buryn alyp atamyzdyń dúnıeden ozǵanyna bir ǵasyr tolýyna baılanysty balýannyń nemeresi Shaıdolla Sholaqov aǵamyzben suhbattasqan edik. Sonda ol kisi áńgime arasynda atasynyń dombyrasy týraly aıtyp qaldy.
– Bul dombyrany atamnyń ózi jasaǵan. Men oǵan shúbásiz senemin. О́ıtkeni onyń ákesi Baımyrza babamyz temirden túıin túıgen sheber adam bolǵan. Aǵashtan túrli buıym jasap, úı de salǵan. Atam jasynan ákesiniń qasynda júrip, sheberlikpen aınalysqan. Ol jaıynda ákem Qudaıbergen aıtyp otyratyn. Qazir atam ustaǵan dombyra meniń shańyraǵymda tur. Ony atam men ákemniń kózi retinde kıe tutyp, saqtap otyrmyn, − dep edi sonda balýannyń nemeresi.
