Qazaq beıneleý óneri jyldan jylǵa túrlenip, túlep kele jatyr. Talaı dańqty týyndylar ómirge kelip, sýretshilerdiń eńbegi eptep baǵalana bastady. Ulttyq mýzeı qoryna jınaqtalǵan kartınalarǵa qarap, ótken dáýirdiń qoltańbasymen qatar, búgingi jas tolqynnyń eńbegin, ózindik kózqarasyn kórýge bolady.
Jyljymaly kórmege qatysqan qylqalam sheberleriniń eńbegi oqyrmannyń ystyq yqylasyna ıe boldy. Qazaqstannyń beıneleý ónerin halyqaralyq platformada tanymal etýdi maqsat tutqan is-shara óziniń ıdeıalyq josparyn tolyq oryndady. Ǵasyrdan ǵasyrǵa úndesken beıneleý óneri týyndylary halyqaralyq keńistikke jol tartyp, el mártebesin kóterdi. Kórkemóner kórinisterin tamashalaýǵa kelgen kórermender sýretshilerdiń týyndylarynan estetıkalyq lázzat alyp, uıymdastyrýshylarǵa alǵysyn jaýdyrdy.
Jıyn barysynda Ulttyq mýzeı dırektorynyń orynbasary Abaı Satybaldın kórme týraly pikir bildirip, jyly lebizin jetkizdi.
«Jyljymaly kórme – qazaq beıneleý óneriniń damýyna úles qosatyn úlken is-shara. Munda árbir avtor óziniń eń súıikti týyndylaryn joldap, oqyrmanǵa tartý etedi. Qazaq óneriniń bıigine kóterilgen sýretshilerdiń eńbegi kól-kósir. Ony oqyrmanǵa nasıhattaý búginde paryz. Osy múdde jolynda atqarylyp jatqan is-sharanyń kópshilikke bereri kóp», dedi ol.
Uıymdastyrýshylardyń aıtýynsha, Halyqaralyq qarjy ortalyǵy galereıasyndaǵy «Ǵasyrlar boıaýy» kórmesi Qazaqstan beıneleý óneriniń joǵary deńgeıdegi jetistikterin otandyq jáne álemdik mádenı qaýymdastyqqa tanystyrýǵa orasan zor septigin tıgizedi. Ári kórmede usynylǵan jumystardyń kompozısııalyq sıýjetteri búgingi zamanaýı talpynystar men joǵary maqsattarǵa úndes jańǵyryq bolatyn, keshe men búgindi baılanystyratyn úılesimde beınelengen.
Búginde Qazaqstan beıneleý óneriniń negiziniń qalanýy men onyń damý tarıhyń basty tórt kezeńin atap kórsetýge bolady. Barlyq kezeńderdi bastan ótkergen kásibı sýretshiler mektebiniń tájirıbesi mol jáne zor mádenı muraǵa ıe ekeni daýsyz. Eń qyzyǵy, kórmege beıneleý óneri mektebiniń dúnıege kelýi, qalyptasýy men turaqtalýynyń alǵashqy úsh kezeńi, ıaǵnı XIX ǵasyrdyń sońy – XX ǵasyr 80-jyldardyń basy usynylyp otyr.
Aıta keteıik, ekspozısııaǵa belgili qylqalam sheberleri A.Dúzelhanovtyń «Kóktem», Nellı Býbeniń «Arhaık», J.Shardenovtiń «Bezmıatejnye sopkı», N.Qılybaevtyń «Besik jyry», M.Nurǵojınnyń «Shý ózeni», A.Aqanaevtyń «Jibek joly», S.Smaǵulovtyń «Meniń taýym», B.Býrdesbekovtiń «Balyqtar», Marat Bekeevtiń «PlayXIV», Dáýren Qasteevtiń «Kishkentaı ımperator», Rashıd Qulbatyrovtyń «Alataý baýraıy», A.Esdáýletovtiń «Atameken» syndy esimi elimizge ǵana emes, álemge tanymal sýretshilerdiń kartınalary usynyldy.
