16 mamyr kúni keshke «102» pýltine Gorkıı kóshesindegi úılerdiń aýlasyndaǵy balalar alańynda mas er adamnyń júrgeni týraly habarlama kelip túsken. Shaqyrý boıynsha jaqyn mańdaǵy avtopatrýl men Ulttyq ulan áskerı qyzmetshileriniń jaıaý narıady tekserýge barǵan.
SQO Polısııa departamenti baspasóz qyzmetiniń málimetinshe patrýldik top kelgen kezde kúdikti qarsylyq kórsetken, dóreki sózder aıtyp, tártip saqshylarynyń bireýine judyryq ala umtylǵan. Polıseılerge basbuzardyń qolyna kisen salýyna týra kelgen.
Tekseris barysynda quqyq buzýshynyń buryn buzaqylyq jasap, sýyq qarýdy zańsyz saqtaǵany úshin sottalǵan 38 jastaǵy qala turǵyny ekeni anyqtaldy. Medısınalyq kýálandyrý masańdyq deńgeıin kórsetti.
Er adamǵa qatysty QR Ákimshilik quqyq buzýshylyq týraly kodeksiniń 440-baby «Alkogoldik ishimdikterdi ishý nemese qoǵamdyq oryndarǵa masań kúıde kelý» boıynsha materıal jınalyp, sotqa joldandy.
«Budan bólek, QR Qylmystyq kodeksiniń 380-baby «Bılik ókiline qatysty kúsh qoldaný» boıynsha materıal jınaldy. Saraptama taǵaıyndaldy, onyń nátıjesi boıynsha prosessýaldyq sheshim qabyldanatyn bolady. QR QK 380-baby 1-bóliginiń sanksııasy 3 myń aılyq eseptik kórsetkishke deıingi mólsherinde aıyppul salýdy ne 3 jyl merzimge bas bostandyǵynan aıyrý jazasyn kózdeıtinin eske salamyz. Túbegeıli sheshimdi quzyrly organ shyǵarady», deıdi Petropavl qalalyq PB bastyǵy polısııa polkovnıgi Jandos Muqatov.
Kúdikti qaıtadan temir torǵa qamalýy múmkin. Tártip saqshysynyń densaýlyǵyna qanshalyqty zııan keltirilgenin saraptama qorytyndysy anyqtaıdy.
