18 mamyrda 4 500 tonna unnyń alǵashqy partııasy 75 temir jol vagonymen tasymaldandy. Onyń 30-y Bishkekke jetkizilse, qalǵandary eldiń basqa óńirlerine jiberildi.
Qyrǵyzstannyń Aýyl, orman jáne sý sharýashylyǵy mınıstriniń orynbasary Azamat Mýkashevtyń aıtýynsha: «Qazirgi kezde mınıstrler kabıneti densaýlyq saqtaý mınıstrligimen birlesip undy halyqqa, onyń ishinde ásirese áleýmettik jaǵynan nashar qamtylǵan adamdarǵa taratý máselesin pysyqtap jatyr. Meniń oıymsha, qazirgi jaǵdaıda Qazaqstan Respýblıkasynyń tarapynan úlken kómek bolyp otyr».
Qyrǵyz tarapynyń aqparatyna qaraǵanda, gýmanıtarlyq kómektiń birinshi partııasy Memlekettik materıaldyq rezerv mekemesiniń Qyrǵyzstannyń Qara-Balta, Balyqshy qalalaryna, ıaǵnı soltústigindegi qoımalaryna bólindi. Unnyń qalǵan bóligi eldiń ońtústigindegi Osh pen Djalal-Abadqa tasymaldanady.
«Gýmanıtarlyq kómek ataýly túrde jetkizilip otyr, sondyqtan atalǵan un bul oblys ortalyqtarynda, osy ónimge zárý túpki alýshylar arasynda taratylmaq. Áleýmettik qoldaýmen qamtylǵan adamdarǵa tegin beriledi», dep atap ótti A. Mýkashev.
Osy oraıda qyrǵyz tarapy Qazaqstan Úkimetine jáne tıisti memlekettik organdaryna gýmanıtarlyq kómekti jedel jetkizgeni úshin aıryqsha alǵysyn bildirdi.
Eske salsaq, gýmanıtarlyq kómek máselesi Qazaqstan Prezıdenti Q. Toqaev pen Qyrǵyzstan Prezıdenti S. Japarovtyń 2021 jyldyń 1 mamyrynda telefon arqyly suhbatta qarastyrylǵan bolatyn.
Qazaqstannyń Qyrǵyzstandaǵy Elshisi Rápil Joshybaev Qazaqstannan ótken jyly indet bastalǵan kezde-aq gýmanıtarlyq kómek sheńberinde 5 000 tonna otandyq un ónimi Qyrǵyzstanǵa jiberilgenin atap ótti.
«2020 jyly kúzde Úkimettiń sheshimimen elimizde jasalǵan 400 dana portatıvti jeldetý apparaty, 2 mıllıon betperde jiberildi. Buǵan qyrǵyz halqy rızashylyǵyn bildirip jatyr. Biz qıyn kezde árqashan kómektesemiz degen oıdamyn», dedi ol.
Gýmanıtarlyq júktiń qalǵan bóligi mamyrdyń aıaǵyna deıin jetkiziledi.
Oǵan qosa, ónimdiligi joǵary kúzdik bıdaıdyń 1 myń tonnasyn jetkizý máselesi sheshilýde. Bul kómek tek halyqtyń nashar qamtylǵan bóligine ǵana emes, Qyrǵyzstannyń fermerlerine de berilip, olar óz egistik alqaptaryna sapaly tuqym egetin bolady.
