Qamaýda otyrǵan sottalýshylarǵa keletin túrli sálemdemeniń arasynda ruqsat etilmegen zattar da kezdesedi. Túrme qyzmetkerleri ondaı zattardy der kezinde anyqtap, tárkilep otyrady.
RÝ-170/3 mekemesindegi rejım bóliminiń bastyǵy ádilet maıory Asylan Batyrovtyń aıtýynsha, ruqsat etilmegen zattar, ásirese esirtki kóbinese azyq-túliktiń, dári-dármektiń ishine, temeki ónimderine jasyrylady, kıim astaryna tigiledi eken.
– Bizdiń mekemeniń jedel bólim qyzmetkerleri jaqynda áldekimder túrmege tıym salynǵan zattardy kirgizýge árekettenip jatqany týraly habar aldy. Sóıtip, Ulttyq ulan sarbazdarymen birge jedel tekserý is-sharasyn uıymdastyrdy. Qamaýdaǵy K. degen azamatqa kelgen banderoldiń ishinen uıaly telefon shyqty. Akt jasap, tıym salynǵan zatty tárkiledik, – deıdi Asylan Batyrov.
Adamnyń qııaly sheksiz ǵoı, «ónertapqyshtar» smartfondy úıge kıetin jeńil súıretpeniń ultanyna jasyrypty.
Zań boıynsha qylmystyq-atqarý júıesi mekemelerinde jazasyn ótep jatqan tulǵalarǵa alkogoldi ishimdik, esirtki sıpaty bar dári-dármek, aqsha, túrmede tıym salynǵan basqa da zattardy berýge bolmaıdy. Mundaı áreket anyqtalǵan jaǵdaıda ol zattar tárkilenip, ákelgen nemese jibergen adamǵa eskertý beriledi nemese aıyppulǵa tartylady. Al esirtki zattaryn ótkizgender qylmystyq jaýapkershilikke tartylady.
